მერაბ დვალიშვილი MMA-ის ახალი ქართული ორგანიზაცია რკენა-ს პირველ ღონისძიებას გამოეხმაურა და სოციალურ ქსელში პოსტი გაავრცელა.
"ყოჩაღ RKENA! ვუყურებ პირდაპირ ეთერში და ნამდვილად ახალი სიტყვაა ქართულ MMA-ში. წარმატებები ყველა მებრძოლს! Setanta Sports Georgia ბრავო", - დაწერა დვალიშვილმა.
რკენას პირველი ღონისძიებები გადავსებულ სპორტის სასახლეში, აქტიური გულშემატკივრობისა და ემოციების ფონზე წარიმართა. ტრიბუნებსა და ოქტაგონს შორის კავშირი თითოეულ მომენტში ნათლად იგრძნობოდა.
კარგად დაგეგმილი და წარმართული პროცესი, ლამაზი განათება, სათანადო მუსიკალური გაფორმება და საინტერესო, დაძაბული ორთაბრძოლები. შეიძლება ითქვას, რომ რკენა-ს სადებიუტო ღონისძიებამ წარმატებულად ჩაიარა, რითაც ორგანიზაციამ გასცა ავანსი, რომ ქართული MMA-ის დონე თანდათან კიდევ უფრო ამაღლდეს.
შეგახსენებთ, რკენა შერეული საბრძოლო ხელოვნების (MMA) ახალი ქართული ორგანიზაციაა. მისი ეგიდით, Fight Night-ების სერია გაიმართება - პირველ ეტაპზე საქართველოში, სამომავლო მიზანი კი საერთაშორისო ასპარეზზე გასვლა იქნება.
