ინგლისის პრემიერ ლიგის ფინალურ ტურში ლონდონის ჩელსი სანდერლენდს სტუმრად უპირისპირდება.
კალუმ მაკფარლეინის გუნდისთვის ეს მატჩი გადამწყვეტია, რადგან კლუბს ჯერ კიდევ აქვს შანსი, მომავალ სეზონში ევროპის ლიგაზე ან კონფერენს ლიგაზე ითამაშოს. ეს უმნიშვნელოვანესი ფაქტორია ახალი მწვრთნელისთვის, ჩაბი ალონსოსთვის, რომელიც ლონდონურ კლუბს მიმდინარე ზაფხულს ოფიციალურად ჩაიბარებს.
ჩელსი ამჟამად სატურნირო ცხრილში მერვე ადგილს იკავებს. ჩემპიონთა ლიგაზე გასვლის შანსი გუნდს უკვე დაკარგული აქვს, თუმცა ევროპის ლიგაზე მოსახვედრად მათ აუცილებლად უნდა აჩვენონ ბრაიტონზე უკეთესი შედეგი, რომელიც პარალელურ მატჩში მანჩესტერ იუნაიტედს მასპინძლობს. თუ ასტონ ვილა სეზონს მეოთხე ადგილზე დაასრულებს, მაშინ პრემიერ ლიგის მეშვიდეადგილოსანი გუნდიც ევროპის ლიგის საგზურს მიიღებს (მანჩესტერ სიტის მიერ ასოციაციის თასის მოგების ხარჯზე, რომლის საგზურიც ჩემპიონატში გადაანაწილეს). ამჟამად მეშვიდე პოზიციას სწორედ ბრაიტონი იკავებს და გამარჯვების შემთხვევაში ამ ადგილს გაინაღდებს.
რაც შეეხება კონფერენს ლიგას, ჩელსი ამ წუთისთვის მერვე ადგილზეა, რაც ამ ტურნირის საგზურს იძლევა, თუმცა მათ ზურგს ბრენტფორდი და სანდერლენდი უყურებენ. ბრენტფორდი ენფილდზე ლივერპულს სტუმრობს და ლონდონელებს მხოლოდ ბურთების შეფარდებით ჩამორჩება. თუ სანდერლენდი ჩელსის დაამარცხებს და ბრენტფორდზე უკეთეს შედეგს აჩვენებს, მაშინ მერვე ადგილს სწორედ შავი კატები დაიკავებენ. შესაბამისად, ჩელსიმ კონფერენს ლიგის საგზურის შესანარჩუნებლად სანდერლენდთან მატჩში მარცხი უნდა აიცილოს და პარალელურად, ბრენტფორდზე ნაკლები ქულა არ უნდა აიღოს.
