ისევ სათადარიგო იყო - გოგლიჩიძის უდინეზემ სტუმრად პარმას მოუგო

საბა გოგლიჩიძის უდინეზემ, სერია A-ს მე-13 ტურში, პარმა სტუმრად 2:0 დაამარცხა. ქართველი მცველი ისევ სათადარიგოთა შორის იყო.

საბას კონკურენტმა ნიკოლა ბერტოლამ, რომელიც მე-4 ტურია ძირითადში თამაშობს, WhoScored-ისა (8.1) და SofaScore-ის (8.4) ვერსიით, გოლის ავტორ ქენან დევისის შემდეგ, ორივე გუნდში ყველაზე მაღალი შეფასება დაიმსახურა.

იუვენტუსთან წარუმატებელი მატჩის შემდეგ, უდინელთა მთავარი მწვრთნელი გოგლიჩას 4 ტურია აღარ ათამაშებს. წინა ტურის პრესკონფერენციისას, კოსტა რუნიაიჩმა განაცხადა: "გოგლიჩიძე პროგრესირებს, იზრდება, მაგრამ ფიზიკურ კომპონენტებზე მუშაობა კიდევ სჭირდება. როცა ნაკრებიდან დაბრუნდა, საუკეთესო კონდიციებში არ ყოფილა, ამის მიუხედავად, ყველა ვარჯიშზე სათანადოდ იმუშავა. სწორ გზაზე დგას".

პარმასთან გამარჯვების შემდეგ, უდინეზემ 18 ქულა მოაგროვა და სერია A-ს ცხრილის მე-9 ადგილამდე აინაცვლა. შემდეგ ტურში, 8 დეკემბერს, მე-15 ადგილოსან ჯენოას უმასპინძლბენ.