ამერიკული ფეხბურთის ყოფილმა ვარსკვლავმა და ჰაისმანის ტროფის მფლობელმა, ჯონი მანზილმა, შაბათ საღამოს MMA-ში თავისი სადებიუტო შეხვედრა ჩაატარა. ტურნირზე Brand Risk Promotions 14 მან ტექნიკური ნოკაუტით დაამარცხა ცნობილი ინფლუენსერი ბობ მენერი, თუმცა ამ დაპირისპირებას ექსპერტებმა და გულშემატკივრებმა უკვე უწოდეს „სპორტის ისტორიაში ყველაზე უხარისხო და ცუდი ბრძოლა“.
იმისათვის, რომ ორთაბრძოლა საერთოდ შემდგარიყო, მხარეებს წონებს შორის არსებული დიდი სხვაობის გამო სპეციალური დათმობების მოუწიათ. სამოყვარულო წესებით დაგეგმილი სამრაუნდიანი ჩხუბი საბოლოოდ მხოლოდ რამდენიმე წუთს გაგრძელდა, რადგან ფიზიკურად ბევრად უფრო ძლიერმა მანზილმა მოუმზადებელ და მასზე ბევრად დაბალ მეტოქეს იოლად აჯობა.
ცნობილი რეპერი დრეიკი, რომელიც მანზილის ახლო მეგობარია ჯერ კიდევ მისი ტეხასის უნივერსიტეტში თამაშის პერიოდიდან, ღონისძიებას პირადად უნდა დასწრებოდა, თუმცა დარბაზში მისვლა ვერ მოახერხა. მატჩის დასრულების შემდეგ მანზილმა სოციალურ ქსელში პოსტი გამოაქვეყნა, სადაც საკუთარი გამოსვლა მწვავედ გააკრიტიკა და მეგობარს საიდუმლო ჩანაფიქრი გაუმხილა:
„ორივემ საშინლად, ნაგავივით ვიჩხუბეთ, თუმცა მადლობა ბობს, რომ ოქტაგონზე გამოვიდა და ამით დანა უაითს 10 000 დოლარი დააკარგვინა. დრეიკ, შენ კი გეტყვი, რომ ჩემი დარტყმებით მის შუბლზე შენი ბრენდის სახელიs, OVO-ს, დაწერას ვცდილობდი.“
OVO (October’s Very Own) კანადელი მუსიკოსის ცნობილი ბრენდი და ხმისჩამწერი სტუდიაა.
მიუხედავად გამარჯვებისა, ჯონი მანზილმაც და ბობ მენერმაც რინგიდან გასვლისთანავე ერთხმად განაცხადეს, რომ ეს მათი პირველი და უკანასკნელი ბრძოლა იყო და შერეულ ორთაბრძოლებში დაბრუნებას აღარ აპირებენ.
მანზილს, რომელსაც თავის დროზე ფენომენალურ ნიჭს უწინასწარმეტყველებდნენ, NFL-ში კარიერა არეული და ხმაურიანი ცხოვრების სტილის გამო დაენგრა, სპორტულ ფორმაში დაბრუნების ეს მცდელობა კი უფრო კომედიურ შოუს დაემსგავსა, ვიდრე პროფესიონალურ სპორტულ ივენთს.
