ჯასტინ გეიჯის გეგმა ილია თოფურიას წინააღმდეგ

ჯასტინ გეიჯიმ კარგად იცის, რომ 14 ივნისს ილია თოფურიას საკუთარი რიტმის პოვნის საშუალება არ უნდა მისცეს.

თოფურიამ მანამდე გეიჯისა და პედი პიმბლეტის 25-წუთიანი ბრძოლა კრიტიკულად შეაფასა იმ ტექნიკის გამო, რომელიც მებრძოლებმა ოქტაგონზე გამოიყენეს. თავად გეიჯი მიიჩნევს, რომ პიმბლეტთან ზუსტად ისე იბრძოლა, როგორც მსუბუქი წონის დროებითი ჩემპიონის ტიტულის მოსაგებად იყო საჭირო.

მან იცოდა, რომ მეტოქის უკან დახევა სტილისტური თვალსაზრისით აუცილებელი იყო და ახლახან მიანიშნა, რომ მსგავსი მიდგომის გამოყენებას მომავალ თვეშიც გეგმავს. მიუხედავად იმისა, რომ გეიჯი ხშირად საუბრობს ტაქტიკის შეცვლაზე (როგორც ეს რაფაელ ფიზიევთან ბრძოლის წინ გააკეთა), ფანები მას მაინც აგრესიულ და დაუნდობელ სტილთან აიგივებენ.

ამ წლის დასაწყისში პიმბლეტთან მიღწეული წარმატების შემდეგ გეიჯიმ აღნიშნა, რომ პედის ადრეულ ეტაპზევე უკან დახევა და მისი დაზიანება გამარჯვების გასაღები აღმოჩნდა. მისი თქმით, ასე მოიქცევა მომავალ ორთაბრძოლაშიც:

ამ ბიჭებს უზარმაზარი მენტალური უპირატესობა და იმპულსი აქვთ. პედისაც დიდი მუხტი ჰქონდა და ამ ბრძოლაშიც ზუსტად იგივე უნდა გავაკეთო - ეს მუხტი ადრევე უნდა წავართვა. პიმბლეტთან ეს კორპუსში ძლიერი დარტყმით მოვახერხე, პირველსავე რაუნდში დავაგდე და ამის შემდეგ მას უკვე მუხტის დასაბრუნებლად მოუწია ბრძოლა. ეს ფაქტორი თოფურიასთანაც უმნიშვნელოვანესი იქნება.

გეიჯი მართალია, როდესაც მეტოქეების თავდაჯერებულობაზე საუბრობს. პიმბლეტს იანვარში გეიჯისთან პირველ მარცხამდე ზედიზედ 7 გამარჯვება ჰქონდა UFC-ში. რაც შეეხება ილია თოფურიას, მატადორს პროფესიონალურ კარიერაში დამარცხება საერთოდ არ უგემია და თეთრ სახლში დაგეგმილ ტურნირზე თავის 17-0 სერიას დადებს სასწორზე.

გასაკვირი არ არის, რომ გეიჯის გეგმაა პირველივე წამებიდანვე გამოსცადოს როგორ გაუმკლავდება ილია ადრეულ პრესინგსა და სირთულეებს. ამერიკელი ჩემპიონის ფანებს ის აშინებთ, რომ ჩარლზ ოლივეირამაც მსგავსი სტრატეგია სცადა თოფურიასთან, მაგრამ ყველაფერი პირველსავე რაუნდში მისი ნოკაუტით დასრულდა.