კეინი გრძელვადიან და სარეკორდო კონტრაქტს ითხოვს

გერმანიის თასის ფინალში შტუტგარტის წინააღმდეგ შესრულებული ჰეთ-თრიკის შემდეგ, მიუნხენის ბაიერნის ვარსკვლავმა ჰარი კეინმა კლუბთან ხელშეკრულების შესაძლო გახანგრძლივებაზე ისაუბრა და მიანიშნა, რომ მოლაპარაკებები მარტივი არ იქნება.

32 წლის ინგლისელ თავდამსხმელს მიუნხენელებთან მოქმედი კონტრაქტი 2027 წლამდე აკავშირებს.

„ჩემი კარიერის ამ ეტაპზე მსურს კონტრაქტიდან მაქსიმუმი მივიღო. ეს იქნება ერთ-ერთი ბოლო ხელშეკრულება, რომელსაც მე, როგორც ფეხბურთელი, ხელს მოვაწერ“, - განაცხადა კეინმა. ბაიერნის სპორტულ დირექტორს, მაქს ებერლს სურს, რომ მოლაპარაკებები ივნისის შუა რიცხვებში, მსოფლიო ჩემპიონატის დაწყებამდე დასრულდეს, თუმცა თავად ფეხბურთელი პროცესების დაჩქარებას არ აპირებს და გადაწყვეტილების მიღებას მუნდიალის შემდეგ გეგმავს.

კეინი ბაიერნს 2023 წელს ტოტენჰემიდან შეუერთდა და წლიურად 25 მილიონ ევროს გამომუშავებს. გერმანული მედიის ინფორმაციით, კლუბის ხელმძღვანელობა მას 2-წლიან შეთანხმებას სთავაზობს, თუმცა თავად ფეხბურთელს კონტრაქტის 2030 წლამდე გახანგრძლივება სურს.

კლუბის ყოფილმა ფეხბურთელმა დიტმარ ჰამანმა ბაიერნის ხელმძღვანელობა გრძელვადიანი ხელშეკრულების გაფორმებისგან გააფრთხილა: „ის უკვე 33 წლის ხდება და საკითხავია, კიდევ რამდენ ხანს შეძლებს ამდენი გოლის გატანას? ერთწლიანი გახანგრძლივება -კი, მაქსიმუმ ორი წელი, მაგრამ სამი წელი, ჩემი აზრით, უკვე ზედმეტია“. მიუხედავად ამისა, ჰამანმა დაამატა, რომ კეინი ბაიერნისა და მთელი ბუნდესლიგის შესანიშნავი ელჩია. მიუნხენურ გრანდში გატარებულ სამ სეზონში ინგლისის ნაკრების კაპიტანმა უკვე 146 გოლის გატანა მოახერხა.