"მადლობა, რომ გამიგეთ და არ მიმატოვეთ" - შარიქაძის პრესკონფერენცია გამარჯვების შემდეგ

ორგანიზაცია რკენა-ს ეგიდით, MMA-ს კარიერაში მიღწეული სადებიუტო გამარჯვების შემდეგ, მერაბ შარიქაძემ ჟურნალისტებთან კომენტარი გააკეთა.

"უდიდესი მადლობა ქართველ გულშემატკივარს, რა მაგრად დამიდგნენ გვერდით?! როდესაც ჩემი ამბის შესახებ საჯაროდ საუბარი გადავწყვიტე, არ ველოდი, თუ ადამიანებისგან ასეთი დამოკიდებულება მსგავსი მასშტაბით წამოვიდოდა, უამრავი მხარდამჭერი და ემპათიური მესიჯი მივიღე.

იმ ინტერვიუს უფრო იმ ხალხისთვის ვწერდი, ვისაც ჩემი ამბავი აინტერესებდა და ამდენი ხნის განმავლობაში უინფორმაციოდ დავტოვე. სიმართლე გითხრათ, ვფიქრობდი, რომ სხვები ამას ცუდად მიიღებდნენ და სიძულვილი წამოვიდოდა. ცხადია, ასეთებიც იყო, მაგრამ ეს არაფერია იმასთან შედარებით, რამდენი დადებითი ემოციაც გამომიგზავნეს.

ისეთი მუხტი და ენერგეტიკა მივიღე. დიდი მადლობა თითოეულ გულშემატკივარს იმისთვის, რომ ასე გაიზიარეთ ჩემი ტკივილი და ამ ბრძოლის წინ არ მიმატოვეთ.

ცალკე დიდი მადლობა იმისთვის, რომ გამიგეთ და სწორად აღიქვით ის, რაშიც გავეხვიე. ჩემი შრომა დააფასეთ და მხოლოდ ამისთვისაც კი ღირდა ცხოვრება. არ ვიცი, მომავალი როგორი იქნება, მაგრამ თქვენი და უფლის მადლიერი ვარ", - განაცხადა შარიქაძემ.

ქვემძიმე წონის საგამოფენო ბრძოლაში, შარიქაძემ პოლონელ პატრიკ კონტნის ტექნიკური ნოკაუტით მოუგო და რკენა 1-ის ღონისძიების ბოლოს ქართველი გულშემატკივარი განსაკუთრებულად გაახარა.

მერაბის გარდა, მთავარი ქარდის ეგიდით, თავიანთი ბრძოლები გიორგი ფოლადიშვილმა, ნიკა აბრამიშვილმა და დავით ლორთქიფანიძემ მოიგეს. პრელიმებში კი, ჯანსუ გოგიამ, ზუკა ივანიაძემ და საბა სოზაშვილმა გაიმარჯვეს.

საერთო ჯამში, რკენა 1-ზე გამართული 9-დან 7 ბრძოლა ქართველთა გამარჯვებით დასრულდა - მხოლოდ ნინი ცქვიტარია და ჯუბა ბერიძე დამარცხდნენ.