პირველად ისტორიაში - თოლიების საოცარი ქამბექი

პრემიერ ლიგის მე-7 ტურში ბრაიტონმა საკუთარ სტადიონზე ტოტენჰემი მიიღო. შეხვედრა უხვგოლიანი და დრამატული გამოვიდა.

მატჩის პირველი ტაიმი ლონდონელთა უპირატესობით წარიმართა. 23-ე წუთზე ბრენან ჯონსონმა ანგარიში გახსნა, 37-ე წუთზე კი ჯეიმს მედისონმა გაზარდა სტუმართა უპირატესობა ორამდე და შესვენებაზე ტოტენჰემი კომფორტული სხვაობით გავიდა.

თუმცა მეორე ტაიმში მასპინძლებმა მობილიზება შეძლეს და თამაშის სცენარი მოატრიალეს. 48-ე წუთზე იანკუბა მინტემ ერთი ბურთი გაქვითა. 58-ე წუთზე ჯორჯინიო რუტერმა კაორუ მიტომას პასის შემდეგ ანგარიში გაათანაბრა.

66-ე წუთზე კი დენი უელბეკმა თავისი გუნდის წინ გამყვანი გოლი გაიტანა და საბოლოოდ ბრაიტონს 3 ქულაც მოუტანა.

ეს თოლიებისთვის ისტორიული გამარჯვება გამოდგა, რადგან გუნდმა პრემიერ ლიგაში პირველად მოახერხა იმ მატჩის მოგება, რომლის პირველი ტაიმიც 2-0 წააგო.

ბრაიტონს პრემიერ ლიგაში ჩატარებული 7 მატჩის შემდეგ 12 ქულა აქვს და სატურნირო ცხრილში მე-6 ადგილზეა, ტოტენჰემი კი 10 ქულით მე-9 პოზიციაზეა.