VIDEO: დიდი ნაბიჯი ფინალისკენ - ნიუ იორკმა კლივლენდს სტუმრადაც მოუგო
2 სთ წინ · 0 წთ წასაკითხად
-
Aa
+
ფონტის ზომა
ნიუ იორკ ნიქსი NBA-ის ისტორიაში მე-7 გუნდია, რომელმაც საპლეიოფო ეტაპზე ზედიზედ 10 მატჩი მოიგო - აღმოსავლეთ კონფერენციის ფინალში, კლივლენდ კავალიერსს სტუმრადაც აჯობეს და სერიაში 3:0 გახდა.
სტუმრებმა პარკეტიდან 55.8%-იანი სიზუსტით შეუტიეს, ასევე, 11 სამქულიანი ჩააგდეს და 27-დან 24 საჯარიმო გამოიყენეს.
მაიკ ბრაუნის შეგირდებმა კავზს 4-დან 3 მეოთხედი მოუგეს და 1999 წლის შემდეგ NBA-ის პირველ ფინალს ძალიან მიუახლოვდნენ - 121:108.
"ვფიქრობ, მათი ფიზიკურობისა და ენერგიის გამო იმ დონემდე ვერ მივაღწიეთ, რომ წინააღმდეგობა გაგვეწია. საოცარ სვლაზე არიან და მათი იმპულსის შეჩერება ვერ შევძელით. პირველ თამაშში ამის კარგი შანსი გვქონდა, მაგრამ საქმე ბოლომდე ვერც იქ მივიყვანეთ", - აღნიშნა კლივლენდელთა მთავარმა მწვრთნელმა, კენი ატკინსონმა მატჩის შემდეგ.
ნიქსის მხარეს, საუკეთესო კვლავ ჯეილენ ბრანსონი იყო - 30 ქულა, 3 მოხსნა, 6 ასისტი; მიკაილ ბრიჯისმა 22 ქულა, 6 მოხსნა, 2 ასისტი, 3 ჩაჭრა, 2 დაფარება მიითვალა; ოგუგუა ანუნობის კი 21 ქულა, 7 მოხსნა, 4 ასისტი ჰქონდა.
კლივლენდელთა შორის, ევან მოუბლი 24 ქულით, 6 მოხსნითა და 2 ასისტით გამოირჩა; დონოვან მიტჩელმა 23 ქულა, 1 მოხსნა, 4 ასისტი ჩაიწერა აქტივში; ხოლო ჯეიმს ჰარდენმა - 19 ქულა, 5 მოხსნა, 5 ასისტი.
შედეგად, ნიუ იორკ ნიქსმა პლეი-ოფში ზედიზედ მე-10 თამაში მოიგო და ისტორიაში მე-7 გუნდია, რომელმაც ეს გააკეთა - ბოლოს ასევე 10:0 სვლა 2024 წლის სატიტულო სეზონში ბოსტონ სელტიქსს ჰქონდა.
სერიაში ანგარიში 3:0-ია, მომდევნო და, შესაძლოა, გადამწყვეტი თამაში კი კვლავ კლივლენდში გაიმართება - 26 მაისის 04:00 საათზე.
