"ამ ორ თამაშში გულშემატკივარს ამდენწლიანი სიყვარული და ურთიერთგაგება უნდა დავუფასოთ" - იური ტაბატაძე

საქართველოსა და ესპანეთის ნაკრებთა შეხვედრამდე, ვილი სანიოლთან ერთად, პრესკონფერენციაზე ჩვენი გუნდის დებიუტანტი იური ტაბატაძე იმყოფებოდა.

"გუნდში ძალიან კარგი გარემო დამხვდა. ახალი თაობის ფეხბურთელებს აქამდე ვიცნობდი, უფროსები კი ძალიან კარგად დამხვდნენ და ისეთი შეგრძნება მაქვს, თითქოს ჩვენს შორის არანაირი სხვაობა არ არსებობს.

ეს წელი ჩემთვის ცალსახად დადებითი იყო, როცა ეროვნული ლიგიდან მივდიოდი, იმ მომენტში საუკეთესო ბომბარდირი ვიყავი და გოლების გატანა კადისშიც გავაგრძელე.

2 წლის წინ, როდესაც ევროპაში 4-თვიანი პერიოდით წავედი, იქ საქმეები კარგად არ წამივიდა და ბევრმა ჩათვალა, რომ სათანადო დონის ფეხბურთელი არ ვიყავი. თუმცა, შეცდომები გავაანალიზე, რეალობა შევაფასე და ახლა ვარ იქ, სადაც ვარ.

გულშემატკივარს ვეტყოდი, რომ ურთიერთობა უნდა გავაგრძელოთ ისევ იმ სიყვარულით, რწმენითა და ურთიერთგაგებით, რაც ჩვენ შორის აქამდე არსებობდა.

ბიჭები გუშინ ვლაპარაკობდით და ვთქვით, რომ ამ ორ თამაშში ჩვენს გულშემატკივარსა და ქართველ ხალხს გვინდა დავუფასოთ ის სიყვარული და დამოკიდებულება, რასაც ამდენი წელია ჩვენ მიმართ გამოხატავენ.

რაც შეეხება ჩემს პოზიციას, ორივე ფლანგზე წინაც ვთამაშობ და უკანაც, თუმცა, ჩემი აზრითაც და სტატისტიკაც აჩვენებს, რომ ყველაზე ეფექტიანი მარჯვენა შემტევად ვარ. თუმცა, ცხადია, სადაც გუნდს დავჭირდები, იქ ვითამაშებ", - თქვა ტაბატაძემ.

ეროვნული გუნდი ესპანეთს 15 ნოემბერს, 21:00 საათიდან შეხვდება. თამაშს ფრანგი ბენუა ბასტიენი იმსაჯებს.