მანჩესტერ იუნაიტედის კაპიტანმა, ბრუნო ფერნანდეშმა, პრემიერ ლიგის ერთ სეზონში გაკეთებული საგოლე გადაცემების ისტორიული რეკორდი დაამსხვრია. პორტუგალიელმა ვარსკვლავმა ეს მიღწევა მიმდინარე სეზონის ფინალურ დღეს, ბრაიტონის წინააღმდეგ გამართულ მატჩში გააფორმა, როდესაც პატრიკ დორგუს გაატანინა და სეზონში თავისი 21-ე ასისტი ჩაიწერა აქტივში.
ეს მიღწევა კიდევ უფრო ფენომენალურია იმის ფონზე, რომ ფერნანდეშს ჩემპიონატის სასტარტო 7 შეხვედრაში საერთოდ არ ჰქონდა საგოლე გადაცემა გაკეთებული. შესაბამისად, ოცდაერთივე ასისტი მან ბოლო 30 მატჩში მიითვალა. აღსანიშნავია, რომ აქედან 13 საგოლე პასი პორტუგალიელმა რუბენ ამორიმის გუნდიდან წასვლის შემდეგ, სულ რაღაც 18 შეხვედრაში შეასრულა.
31 წლის ნახევარმცველი მანჩესტერ იუნაიტედის ხელახალი აღზევების მთავარი შემოქმედი გახდა. მაიკლ კერიკის მწვრთნელობის პერიოდში გუნდმა საოცარი პროგრესი აჩვენა, სატურნირო ცხრილში მესამე ადგილი დაიკავა და მომავალი სეზონისთვის ჩემპიონთა ლიგის საგზური ოფიციალურად გაინაღდა.
ფერნანდეშის უმაღლესი დონის თამაში შეუმჩნეველი არ დარჩენიათ ექსპერტებსა და გულშემატკივრებს - ბოლო ტურის წინ პორტუგალიელი ოფიციალურად დასახელდა პრემიერლიგის სეზონის საუკეთესო ფეხბურთელად.
VIDEO: რეკორდი მოხსნილია - ბრუნოს 21-ე საგოლე პასი
