თბილისის სპორტის სასახლეში MMA-ის ახალი ქართული ორგანიზაცია რკენა-ს პირველი ღონისძიება გაიმართა. საქართველოს რაგბის ნაკრების ექს-კაპიტანმა მერაბ შარიქაძემ MMA-ის კარიერა გამარჯვებით დაიწყო.
ქვემძიმე წონის საგამოფენო ბრძოლაში, შარიქაძემ პოლონელ პატრიკ კონტნის ტექნიკური ნოკაუტით მოუგო და რკენა 1-ის ღონისძიების ბოლოს ქართველი გულშემატკივარი განსაკუთრებულად გაახარა.
"დიდი მადლობა გულშემატკივარს შესანიშნავი ატმოსფეროსა და ემოციებისთვის. ამ გამარჯვებას ვუძღვნი ჩემს ყველაზე დიდ გულშემატკივარს, რომელიც დღევანდელ დღეს ვერ მოესწრო - დედაჩემს გაუმარჯოს. დე, შენს სულს ვენაცვალე და შენი სახელის ხსოვნა იყოს", - განაცხადა ბრძოლის შემდეგ შარიქაძემ.
მერაბის გარდა, მთავარი ქარდის ეგიდით, თავიანთი ბრძოლები გიორგი ფოლადიშვილმა, ნიკა აბრამიშვილმა და დავით ლორთქიფანიძემ მოიგეს. პრელიმებში კი, ჯანსუ გოგიამ, ზუკა ივანიაძემ და საბა სოზაშვილმა გაიმარჯვეს.
საერთო ჯამში, რკენა 1-ზე გამართული 9-დან 7 ბრძოლა ქართველთა გამარჯვებით დასრულდა - მხოლოდ ნინი ცქვიტარია და ჯუბა ბერიძე დამარცხდნენ.
რკენას პირველი ღონისძიებები გადავსებულ სპორტის სასახლეში, აქტიური გულშემატკივრობისა და ემოციების ფონზე წარიმართა. ტრიბუნებსა და ოქტაგონს შორის კავშირი თითოეულ მომენტში ნათლად იგრძნობოდა.
კარგად დაგეგმილი და წარმართული პროცესი, ლამაზი განათება, სათანადო მუსიკალური გაფორმება და საინტერესო, დაძაბული ორთაბრძოლები. შეიძლება ითქვას, რომ რკენა-ს სადებიუტო ღონისძიებამ წარმატებულად ჩაიარა, რითაც ორგანიზაციამ გასცა ავანსი, რომ ქართული MMA-ის დონე თანდათან კიდევ უფრო ამაღლდეს.
შეგახსენებთ, რკენა შერეული საბრძოლო ხელოვნების (MMA) ახალი ქართული ორგანიზაციაა. მისი ეგიდით, Fight Night-ების სერია გაიმართება - პირველ ეტაპზე საქართველოში, სამომავლო მიზანი კი საერთაშორისო ასპარეზზე გასვლა იქნება.
