პორტუგალიის პრიმეირა ლიგის 2025-26 წლების სეზონის ზამთრის ჩემპიონი პორტუ 5-ქულიანი უპირატესობით გახდა.
36 წლის ფრანჩესკო ფარიოლის გაწვრთნილმა გუნდმა, მე-16 ტურში, ბოლოადგილოსან ავეშს, სამუ ომოროდიონის დუბლით, 2:0 მოუგო და სპორტინგთან 5-ქულიანი დისტანცია შეინარჩუნა.
დრაკონებს შესანიშნავი შედეგები აქვთ, ქულები ერთადერთ ტურში დაკარგეს - შინ ბენფიკასთან (0:0), მთავარ კონკურენტ სპორტინგს კი ლისაბონში მოუგეს.
თავის მხრივ, ჟოზე მოურინიოს ბენფიკას 36 ქულა აქვს და სპორტინგს - 5-ით, ხოლო პორტუს 10 ქულით ჩამორჩება.
პორტუელთა კარს პორტუგალიის ნაკრების ძირითადი მეკარე, დიეგუ კოშტა იცავს და 16 ტურში მხოლოდ 4 გოლი აქვს გაშვებული, მთავარი ბომბარდირი კი ესპანელი ტალანტი, 21 წლის სამუ ომოროდიონია, რომელმაც ამ სეზონში ყველა ტურნირზე 18 გოლი შეაგდო. გუნდს იანვრიდან ლეგენდარული ბრაზილიელი მცველი, ტიაგუ სილვა შეუერთდება.
ცნობისთვის, პორტუს შიდა ჩემპიონატი 30-ჯერ აქვს მოგებული, რაც რეკორდსმენ ბენფიკას მაჩვენებელზე 8 ტიტულით ნაკლებია. სპორტინგი 21-გზის ჩემპიონია, თუმცა ბოლო ორი სეზონი სწორედ მათი ტრიუმფით დასრულდა.
ინფორმაციისთვის ისიც ვთქვათ, რომ დიდი სამეულის გარდა პორტუგალიის ჩემპიონატი ისტორიაში მხოლოდ 2 გუნდს აქვს მოგებული - 1946 წელს ლისაბონურ ბელენენსეშსა და 2001 წელს ბოავიშტას, რომელიც ქალაქ პორტუს წარმოადგენს.
