VIDEO: გიორბელიძე აქტიური იყო - თურქეთის 1-ელ ლიგაში 15-ვე მატჩი სრულად აქვს ჩატარებული

გურამ გიორბელიძემ, თურქეთის 1-ელი ლიგის ეგიდით, მორიგი მატჩი ჩაატარა. მისმა ერზურუმსპორმა ისტანბულსპორს შინ 4:0 მოუგო.

26 წლის ქართველმა მარცხენა მცველმა შეტევაში რამდენჯერმე ეფექტიანად ითამაშა, თუმცა ორ შემთხვევაში მისი საკვანძო პასით წარმართული შეტევა გოლით ვერ დაგვირგვინდა.

აღსანიშნავია, რომ გიორბელიძე, მეკარე ორბანიჩის გარდა, ერზურუმსპორის ერთადერთი ფეხბურთელია, რომელსაც მიმდინარე ჩემპიონატის 15-ვე მატჩი შეუცვლელად აქვს ჩატარებული.

მის გუნდს 15-დან 6 ტურში კარი მშრალად აქვს შენახული, ჯამში კი 13 გოლი გაუშვა, რაც მხოლოდ ჩემპიონატის ლიდერ პენდიკსპორის შედეგს (9) ჩამორჩება.

ვილი სანიოლს გიორბელიძე საქართველოს ნაკრებში ივნისის შეკრების შემდეგ აღარ გამოუძახებია - ივნისში კაბო ვერდესთან 14 წუთით ათამაშა, ფარერებთან მთელი თამაში თადარიგში დატოვა.

15 ტურის შემდეგ, ერზურუმსპორს 26 ქულა აქვს და მე-5 ადგილზე იმყოფება - ლიდერ პენდიკსპორს 6 ქულით ჩამორჩება. მომდევნო ტურში, 7 დეკემბერს, მე-11 ადგილოსან ბოლუსპორს ესტუმრებიან.