პორტუგალიის თასის 1/4 ფინალში, პორტუმ ბენფიკა 1:0 დაამარცხა და ტიტულისთვის ბრძოლას შემდეგ ეტაპზე გააგრძელებს.
პორტუელთა რიგებში ბრაზილიელი ვარსკვლავის, ტიაგო სილვას დებიუტი შედგა. 90 წუთი ითამაშა და, შეფასებების მიხედვით, მოედანზე ერთ-ერთი საუკეთესო იყო - SofaScore-მაც და FlashScore-მაც 7.4-7.4 დაუწერეს.
სილვა დრაკონებს, თავისუფალი აგენტის სტატუსით, დეკემბრის ბოლოს შეუერთდა და კლუბთან 6-თვიანი კონტრაქტი გააფორმა, თუმცა მხარეებს, სურვილის შესაბამისად, მისი კიდევ 1 წლით გახანგრძლივების საშუალება ექნებათ.
რაც შეეხება თამაშს, პორტუსგან გამარჯვების გოლი დაცვის ცენტრში სილვას პარტნიორმა, პოლონელმა იან ბედნარეკმა შეაგდო.
ფრანჩესკო ფარიოლის გუნდი 1/2 ფინალშია და წილისყრას ელოდება. ბენფიკას გარდა, ტურნირიდან გავარდა ბრაგაც, ტიტულისთვის ბრძოლაში მთავარ ფავორიტებად კი პორტუ და სპორტინგი რჩებიან.
ასევეა ჩემპიონატშიც, რომელსაც პორტუ, სპორტინგთან მიმართებით, 7-ქულიანი უპირატესობით ლიდერობს.
