სიახლეები
სეტანტა
სპორტის გურუ
ქვიზები
Copyright © 2023 Adjarabet Arena. All Rights Reserved.
-
Aa
+
ფონტის ზომა
7 სექტემბერს (20:00) საქართველოს ეროვნული ნაკრები ერთა ლიგის მორიგ სანაკრებო ციკლს იწყებს. ერთა ლიგის 2024/25 წლების გათამაშების პირველ მატჩში ეროვნული გუნდი მიხეილ მესხის სახელობის სტადიონზე ჩეხეთის ნაკრებს უმასპინძლებს. ჩვენები ვილი სანიოლის ხელმძღვანელობით ამ მატჩისთვის 24-კაციანი შემადგენლობით მოემზადნენ.
საქართველოს ნაკრების განაცხადი სექტემბრის მატჩებისთვის
საქართველოსა და ჩეხეთის ურთიერთშეხვედრების ისტორია მხოლოდ 1 მატჩს ინახავს, ისიც სულ რამდენიმე თვის წინ, ჩვენთვის ისტორიულ ევროპის ჩემპიონატზე, სადაც ვილი სანიოლის გუნდი ჩეხებს ჯგუფურ ეტაპზე შეხვდა.
ჰამბურგში გუნდებს შორის მატჩი ფრედ 1-1 დასრულდა. შეხვედრაში ანგარიში პირველი ტაიმის მიწურულს თერთმეტმეტრიანის საშუალებით გიორგი მიქაუტაძემ გახსნა, მეორე ტაიმში კი პატრიკ შიკმა წონასწორობა აღადგინა.
იმ მატჩის საუკეთესო მოთამაშედ გიორგი მამარდაშვილი დასახელდა, რომელმაც ევროპის ჩემპიონატზე საქართველოსთვის ისტორიული პირველი ქულის მოპოვებაში უდიდესი წვლილი შეიტანა. ქართველი მეკარის ანგარიშზე მატჩის ბოლოს 11 მოგერიება იყო, საიდანც რამდენიმე განსაკუთრებით რთული ბურთი იყო.
იმ შეხვედრის შემდეგ საქართველომ პორტუგალია დაამარცხა და ევრო 2024-ის 1/8 ფინალში გავიდა, იმ ჯგუფიდან ჩვენთან ერთად პორტუგალია და თურქეთი გავიდნენ, ჩეხეთი კი ჯგუფში ჩარჩა.
ჰამბურგის დაპირისპირებიდან სულ რაღაც 3 თვე გავიდა, მაგრამ ეს დრო საკმარისი აღმოჩნდა იმისთვის, რომ საქართველოს ნაკრები ახალ რეალობაში აღმოჩენილიყო. ვილი სანიოლის გუნდმა ევროპის ჩემპიონატის მთავარი სენსაცია მოახდინა და პლეიოფში გავიდა, რაც ერთა ლიგის ჯგუფში ჩვენი მეტოქეებიდან (ჩეხეთი, ალბანეთი, უკრაინა) ვერცერთმა შეძლო.
ჩეხეთი შეიძლება ითქვას, რომ იგივე გუნდია. დაახლოებით ვიცით, რომ მათგან ისევ ისეთ ფიზიკურ ფეხბურთს უნდა ველოდოთ, რომელიც ბევრ ჩაწოდებაზე და მეორე სართულზე ორთაბრძოლების მოგებაზე იქნება გათვლილი. ჩეხების უპირატესობა საქართველოსთან პირველ მატჩში სწორედ ეს იყო და ამიტომაც მოუწია გიორგი მამარდაშვილს გუნდის ამდენჯერ გადარჩენა.
აღნიშნული ერთა ლიგა ჩვენი ახალი მიზნისკენ სიარულის საშუალებაა. გათამაშება მსოფლიო ჩემპიონატის საგზურის მოპოვების საშუალებას იძლევა.
უეფას ერთა ლიგა - გზა მსოფლიო ჩემპიონატისკენ
აშკარაა, რომ საქართველოს ნაკრებმა თამასა მაღლა ასწია და გულშემატკივრის მოლოდინი ერთი-ორად გაზარდა, თუმცა ამ ყველაფერმა არ უნდა გვამყოფოს ეიფორიაში. უნდა ვიცოდეთ, რომ მსოფლიო ჩემპიონატზე გასვლა იმაზე რთული იქნება, ვიდრე ევროზე მოხვედრა იყო, ამ მიზნისკენ თანმიმდევრულად და ნაბიჯ-ნაბიჯ უნდა ვიაროთ.
ვილი სანიოლის გუნდი კი ამ მიზნისკენ სვლას სწორედ ჩეხეთთან მატჩით იწყებს.
თ
თაზო ჩარკვიანი
კომენტარები