აზაროვის გამომუშავებული პენალტი - შახტარმა ბრესტი დაამარცხა

უეფას ჩემპიონთა ლიგის მე-7 ტურის მატჩში დონეცკის შახტარი გერმანიის ქალაქ გელზენკირხენში ბრესტს დაუპირისპირდა.

უკრაინელთა სასტარტო შემადგენლობაში იყო ირაკლი აზაროვი, რომელმაც მატჩი სრულად ჩაატარა.

მე-18 წუთზე დონეცკელთა მხრიდან ანგარიში კევინმა გახსნა, 37-ე წუთზე აზაროვის საჯარიმოში წაქცევის შემდეგ თერთმეტმეტრიანი დაინიშნა, რომელიც გეორგი სუდაკოვმა ზუსტად შეასრულა და შახტარის უპირატესობა ორამდე გაზარდა.

საბოლოოდ მატჩში პირველი ტაიმის შედეგი შენარჩუნდა და დონეცკელებმა 2-0 მოიგეს. აზაროვმა Sofascore-სგან 7.6 შეფასება დაიმსახურა და მატჩში მე-3 საუკეთესო შეფასება მიიღო.

შახტარი 7 ქულით 27-ე ადგილზეა და პლეიოფში გასვლის თეორიული შანსი ჯერ კიდევ რჩება. ბოლო ტურში უკრაინული გუნდი დორტმუნდს ესტუმრება.