გოლების წვიმა დრაგაუზე - მაგუაირმა იუნაიტედი მარცხისგან იხსნა

უეფას ევროპა ლიგის მე-2 ტურში პორტუმ დრაგაუზე მანჩესტერ იუნაიტედი მიიღო. შეხვედრაში 6 გოლი ვიხილეთ.

მე-7 წუთზე ანგარიში მარკუს რაშფორდმა გახსნა, რომელიც ფლანგიდან საჯარიმოში შეიჭრა და დიოგუ კოშტას ახლო კუთხეში გაუტანა. მე-20 წუთზე რაშფორდმა უკვე საგოლე გადაცემა მიითვალა, გოლი კი რასმუს ჰოილუნდმა მიითვალა.

მანჩესტერმა 2-ბურთიანი უპირატესობა პირველივე ტაიმში გაანიავა. 27-ე წუთზე პეპემ შეამცირა სხვაობა, 34-ე წუთზე სამუ ომოროდიონმა გაათანაბრა ანგარიში. პირველი ტაიმი ფრედ 2-2 დასრულდა.

მეორე ტაიმის სტარტზე მასპინძლები უკვე დაწინაურდნენ. 50-ე წუთზე ომოროდიონმა დუბლი შეასრულა და პორტუ წინ გაიყვანა.

81-ე წუთზე მანჩესტერისთვის სიტუაცია კიდევ უფრო გართულდა. ბრუნო ფერნანდეშმა სახიფათო თამაშის გამო მეორე ყვითელი ბარათი მიიღო და ზედიზედ მე-2 შეხვედრაში მოედნიდან გააძევეს.

მიუხედავად რთული სიტუაციისა, კომპენსირებულ დროში იუნაიტედი მარცხს მაინც გადარჩა. 91-ე წუთზე ერიკ ტენ ჰაგის გუნდს ქულა ჰარი მაგუაირმა მოუტანა, რომელმაც კრისტიან ერიქსენის კუთხურიდან ჩაწოდების შემდეგ თავური დარტყმით აიღო პორტუს კარი და მატჩის საბოლოო ანგარიშიც დააფიქსირა (3-3).

ევროპა ლიგაზე ჩატარებული 2 მატჩის შემდეგ მანჩესტერს 2 ქულა აქვს, პორტუმ კი ამ გათამაშებაში პირველი ქულა მოიპოვა.