პსჟ საქმის დასრულებას ბასკეთში შეეცდება

ჩემპიონთა ლიგის 1/8 ფინალური ეტაპის განმეორებით მატჩში პარის სენ-ჟერმენი რეალ სოსიედადს ესტუმრება.

 

გუნდებს შორის პირველი შეხვედრა პარიზში პსჟ-ს გამარჯვებით 2-0 დასრულდა. გოლები კილიან მბაპემ და ბრედლი ბარკოლამ გაიტანეს.

 

სოსიედადი - პსჟ (23:59) - უყურე მატჩს უფასოდ adjarabetarena-ზე.

 

პარიზული მატჩის შემდეგ ცუდად წაუვიდა საქმე სოსიედადს, რომელმაც ლა ლიგაში 3-დან 2 მატჩი წააგო და კოპა დელ რეის 1/2 ფინალში მალიორკასთან პენალტების სერიაში დამარცხდა. გუნდმა ჩემპიონატში ვილიარეალთან და სევილისათან დათმო თავისი მატჩები, თანაც ისე, რომ ორივე მეტოქისგან 3-3 გოლი გაუშვა.

 

იმანოლ ალგიასილი (სოსიედადის მწვრთნელი): "მოთამაშეების ხასიათის ჩვენებას ვთხოვ, როგორც პარიზში. პირველ მატჩში ვაჩვენეთ, რომ ეს შეგვიძლია. ჩვენი მხრივ, ყველაფერს გავაკეთებთ, რაც შეგვიძლია. საუკეთესო ატმოსფერო მსურს, როგორც მოედანზე, ისე მოედანს გარეთ. არ იქნება ადვილი, მაგრამ იმედით სავსე ვართ. მნიშვნელოვანია ბრძოლა და ცოცხლად დარჩენა."

 

 

ტაკეფუსა კუბო (სოსიედადის შემტევი): "ევროპაში ერთ-ერთი საუკეთესო გუნდის წინააღმდეგ საუკეთესო სოსიედადი დაგვჭირდება. ეს უბრალო მატჩი არაა. ჩვენ სურვილი და ენთუზიაზმი გვაქვს და ყველაფერი შესაძლებელია. გულშემატკივრებს ჩვენი სჯერათ და ჩვენ ვიბრძოლებთ. ვფიქრობ, დიდებული საღამო იქნება."

 

 

რაც შეეხება პსჟ-ს, პარიზელებმა პირველი მატჩის შემდეგ ლიგა 1-ში 3 მატჩი ჩაატარეს, საიდანაც 2 ფრედ დაასრულეს. აღსანიშნავია, რომ კილიან მბაპეს არცერთ მათგანში უთამაშია სრულად. ნანტთან ფრანგი შეცვლაზე შემოვიდა და მოედანზე 29 წუთი გაატარა, რენთან და მონაკოსთან კი ის ლუის ენრიკემ შეცვალა. ესპანელმა მწვრთნელმა ეს იმით ახსნა, რომ გუნდი მბაპეს გარეშე თამაშს ადრე თუ გვიან უნდა შეეჩვიოს.

 

ლუის ენრიკე (პსჟ-ს მწვრთნელი): "განმეორებითი მატჩები ყოველთვის რთულია. პირველ შეხვედრაში კარგი შედეგი ვაჩვენეთ, მაგრამ რთული იქნება, თუ მოედანზე სწორი დამოკიდებულებითა და კონცენტრაციით არ გავალთ. იმედი მაქვს, გუნდი ამას შეძლებს. ეს არის მატჩი, რომელიც აუცილებლად უნდა მოვიგოთ."

 

 

ბრედლი ბარკოლა (პსჟ-ს შემტევი): "ვარჯიშებზე ბევრს ვმუშაობთ, რომ უკეთესები გავხდეთ. წარმატების გასაღები ერთად თამაში იქნება, შეტევასა და დაცვაში ერთიანად უნდა ვიმუშაოთ. ამ მატჩის მოგება დიდ ინტენსიურობას მოითხოვს."

 

 

სავარაუდო შემადგენლობები:

 

სოსიედადი - რემირო; გალანი, სუბელდია, ლე ნორმანი, ტრაორე; სუბიმენდი, მენდესი; ოიარსაბალი, ანდრე სილვა, კუბო.

 

პსჟ - დონარუმა; ჰაკიმი, მარკინიოსი, ბერალდო, ერნანდესი; ზაირ-ემერი, ვიტინია, ფაბიან რუისი; დემბელე, მბაპე, ბარკოლა.

 

მატჩს ინგლისელი მაიკლ ოლივერი განსჯის, რომელმაც ჩემპიონთა ლიგის მიმდინარე სეზონში 2 შეხვედრაში იმსაჯა: ბრაგა - რეალი და სოსიედადი - ინტერი. არბიტრმა მოთამაშეებს ჯამში 8 ყვითელი ბარათი უჩვენა.