სიტი და არსენალი სანაკრებო პაუზაზე საშინაო გამარჯვებებით გავიდნენ

პრემიერ ლიგის მე-7 ტურში მან სიტიმ და არსენალმა საშინაო გამარჯვებები მოიპოვეს.

მან სიტი 3-2 ფულემი

26-ე წუთზე ანდრეას პერეირამ კარგ ფორმაში მყოფი ფულემი დააწინაურა, თუმცა ექვს წუთშივე წონასწორობის აღდგენა მატეო კოვაჩიჩმა მოახერხა.

მეორე ტაიმის სტარტზევე ხორვატმა დუბლი შეასრულა და სიტი წინ გაიყვანა, 82-ზე კი ჯერემი დოკუმ ქალაქელებს გადამწყვეტი უპირატესობა მოუტანა. 88-ე წუთზე როდრიგო მუნისმა ანგარიში მინიმუმამდე შეამცირა, თუმცა გვარდიოლას გუნდმა უპირატესობა ბოლომდე შეინარჩუნა და მორიგი 3 ქულა ჩაიწერა აქტივში.

მან სიტიმ 17 ქულა დააგროვა და ლიდერ ლივერპულთან სხვაობა 1 ქულამდე შეამცირა.

არსენალი 3-1 საუთჰემპტონი

სიტის მატჩის მსგავსად, ამ შეხვედრაშიც სტუმრები დაწინაურდნენ - 55-ე წუთზე არჩერმა ანგარიში 1:0 გახადა, თუმცა არსენალმა წონასწორობის აღდგენა სამ წუთშივე, ჰავერცის მეშვეობით მოახერხა.

68-ზე მარტინელიმ პრემიერ ლიგის ამ სეზონში პირველი გოლი გაიტანა, მატჩში წერტილი კი ბუკაიო საკამ 88-ე წუთზე დასვა.

სიტის მსგავსად, არსენალმაც 17 ქულა დააგროვა და მესამე ადგილს მხოლოდ დამატებითი მაჩვენებლების გამო იკავებს.