უხვგოლიანი ფრე ფრანკფურტში - ბაიერნმა ქულები ბოლო წუთზე დაკარგა

გერმანიის ბუნდესლიგის მე-6 ტურში ფრანკფურტის დოიჩე ბანკ პარკზე აინტრახტმა ბაიერნი მიიღო. შეხვედრა უხვგოლიანი და დაძაბული გამოდგა.

ანგარიში მე-15 წუთზე კიმ მინ-ჯემ გახსნა და სტუმრები დააწინაურა. მასპინძლებმა თამაშის მოტრიალება პირველივე ტაიმში შეძლეს. 22-ე წუთზე ჯერ ომარ მარმუშმა, 35-ე წუთზე კი უგო ეკიტიკემ გაიტანეს გოლები და აინტრახტი წინ გაიყვანეს.

თუმცა ეკიტიკეს გოლიდან 3 წუთში დაიო უპამეკანომ გამოიჩინა თავი და პირველი ტაიმი ფრედ 2-2 დასრულდა.

53-ე წუთზე უკვე მაიკლ ოლისემ შეძლო გოლის გატანა და ამჯერად ისევ მიუნხენური გუნდი გავიდა წინ.

ვინსენ კომპანის გუნდი გამარჯვებასთან ახლოს იყო, თუმცა 94-ე წუთზე ომარ მარმუშმა შეძლო დუბლის შესრულება და საკუთარ გუნდს დაძაბულ ბრძოლაში ქულა მოუტანა, ბაიერნმა კი ქულები ბოლო წუთზე დაკარგა.

6 მატჩის შემდეგ ბაიერნს ბუნდესლიგაში 14 ქულა აქვს და პირველ ადგილზეა, აინტრახტი კი 13 ქულით მე-3 პოზიციას იკავებს.

აღსანიშნავია, რომ ბომბარდირთა დავაში პირველ ადგილზე 8 გოლით სწორედ აინტრახტის მოთამაშე ომარ მარმუშია. ეგვიპტელის ანგარიშზე 4 საგოლე გადაცემაცაა.