ჟესუსმა არსენალი ნახევარფინალში გაიყვანა

ინგლისის ლიგის თასის მეოთხედფინალურ მატჩში არსენალმა ემირეითსზე კრისტალ პალასი მიიღო.

შეხვედრაში ანგარიში სწრაფი გოლით გაიხსნა. მე-4 წუთზე სტუმრები ჟან-ფილიპ მატეტამ დააწინაურა, პირველი ტაიმი პალასის გამარჯვებით 0-1 დასრულდა.

მასპინძლებმა ანგარიში 54-ე წუთზე გაათანაბრეს. შეცვლაზე შემოსული მარტინ ოდეგორის პასის შემდეგ გაბრიელ ჟესუსმა გამოიჩინა თავი.

73-ე წუთზე ბრაზილიელმა დუბლი შეასრულა, ამჯერად ასისტენტი ბუკაიო საკა აღმოჩნდა. 81-ე წუთზე კი ჟესუსმა უკვე ჰეთ-თრიქი შეასრულა, ოდეგორმა კი მე-2 საგოლე გადაცემა მიითვალა.

85-ე წუთზე კრისტალ პალასი თამაშში ედი ნკეტიამ დააბრუნა, რომელმაც გოლი ყოფილ გუნდს გაუტანა, თუმცა არტეტას გუნდმა თამაშის ბოლომდე თავის სასარგებლოდ მიყვანა შეძლო.

გაბრიელ ჟესუსი მასპინძლებს გმირად მოევლინა და არსენალი კარაბაო თასის 1/2 ფინალში გაიყვანა.