სიახლეები
სეტანტა
სპორტის გურუ
ქვიზები
Copyright © 2023 Adjarabet Arena. All Rights Reserved.
4 თვის წინ · 0 წთ წასაკითხად
-
Aa
+
ფონტის ზომა
ჩვენი გუნდის თამაშის შეფასება ახლა რთულია, გული და გონება ხომ ემოციებითაა გადავსებულ-გადაღლილი.
ამიტომ, არც მწვრთნელის გადაწყვეტილებებზე ვიტყვი რამეს და მითუმეტეს, არც ფეხბურთელებს შევაფასებ. ისინიც არანაკლებ ნერვიულობდნენ, ისინიც დიდხანს ელოდნენ ამ დღეს, ხოლო გამარჯვება რომ ჩემზე მეტად სურდათ, ამაში დარწმუნებული ვარ. ამას იმიტომ ვამბობ, რომ ძალიან კარგად დავინახე მათი თავდადება და მონდომება ამ წვიმიან დღეს.
ევროპის ჩემპიონატზე ქართველების დებიუტის პირველი და ფრთხილი შეფასება ხვალ იყოს, მაგრამ ჩემთვისაც ისტორიულ წერილში მხოლოდ რამდენიმე აბზაცით ხომ არ შემოვიფარგლები და ამ ჩანახატის მომდევნო ნაწილში იმ მომენტებს გავიხსენებ, თამაშის მსვლელობისას რომ ვიწერდი. სხვა თუ არაფერი, გავა რამდენიმე დღე, ჩეხეთის ნაკრებთან მატჩის სამზადისზე გადავერთვებით და ეგებ, დაგვავიწყდეს კიდეც ის ეპიზოდები, რომელთა გამოც დღეს, სულ რამდენიმე წუთის წინ, ნერვები დაგვაწყდა ან სიხარულისგან ერთმანეთს ჩავეხუტეთ.
გაფრთხილება სჭირდება ისტორიას, ის ეპიზოდები კი, დღევანდელმა თამაშმა რომ დაიტია, სწორედ ისტორიის ნაწილია. ავად თუ კარგად, 2024 წლის 18 ივნისს ქართული ფეხბურთის მატიანეში ერთი საინტერესო ფურცელი შეივსო, რომელსაც შემდგომში არაერთხელ მივუბრუნდებით. ძველი ამბების გახსენება ხომ უკეთესი მომავლის შექმნაში დაგვეხმარება?
თამაშის დაწყებამდე ორი საათით ადრე, სიმართლე გითხრათ, მეგონა, რომ შეხვედრა გადაიდებოდა. იმიტომ, რომ სტადიონი და ვესტფალენპარკი წვიმამ წალეკა. ჩვენი, ჟურნალისტების ტრიბუნიდან მარჯვენა მხარეს ორი ხელოვნური ჩანჩქერიც გაჩნდა.
საბედნიეროდ,ნელ-ნელა ამინდი შედარებით გამოსწორდა და შეხვედრაც დანიშნულ დროს დაიწყო:საქართველოს ნაკრების დებიუტი საოცნებო ტურნირზე თეთრ, მართლა ლამაზ მაისურებში შედგა.
პირველი ტაიმი ჩვენმა გუნდმა კი დაიწყო, მაგრამ საწყისი წუთები აშკარად თურქეთის უპირატესობით წარიმართა. ალბათ, არც იმის თქმა იქნება გადაჭარბებული, რომ სადღაც 25-ე წუთამდეასეთი სურათი იყო, მერე კი, ერთის მხრივ გაუქმებულმა გოლმა და მეორე მხრივ ჩვენი ფეხბურთელების მონდომებით, სურათი შეიცვალა.
პირველი სახიფათო მომენტი ჩვენ კართან აიჰანის თავური იყო, ბურთი მცირე მანძილით ასცდა კარს. იმმომენტში თურქები აშკარად მარცხენა ფლანგიდან თავდასხმებს არჩევდნენ და ამიტომაც დაიტვირთა ოთარ კაკაბაძე ყველაზე ძალიან.
მე-7 წუთზე მეტოქემ კიდევ ერთი კუთხური ჩააწოდა, ძალიან სახიფათო. დარტყმა ისევ აიჰანმა ითავა და ძალიან ზუსტადაც გაისროლა, მაგრამ ადგილზე გაშეშებულ გიორგი მამარდაშვილს, ვინც სამი გაშვებული გოლის მიუხედავად, ერთ-ერთი საუკეთესო იყო, მხსნელად მარჯვენა ძელი მოევლინა - ბურთი საპირისპირო ძელისკენ გავარდა და მომენტიც განიმუხტა.
მე-11 წუთზე ჯვაროსნები პირველ რეალურ საგოლე მომენტს ქმნიან: ანზორ მექვაბიშვილის დარტყმის შემდეგ ბურთი მეტოქის მცველს ხვდება, მიმართულებას იცვლის და სამწუხაროდ, მეკარის ნადავლი ხდება.
მე-14 წუთზე საიმედოდ თამაშობს მამარდაშვილი: იუვენტუსში მოთამაშე კენან ილდიზის მიერ მახვილი კუთხიდან დარტყმულ ბურთს ადგილზე ხვდება.
მომდევნო წუთებში თურქეთის ნაკრებმა უპირატესობა გაზარდა, ქართველები ლამის თავიანთ საჯარიმოსთან ხვდებიან მეტოქეს, ზეწოლა იზრდება და ამ ყოველივეს ლოგიკურ გაგრძელებად იქცა თურქების მარჯვენა მცველის მერტ მულდურის ეფექტური გოლი - 0:1. მან ერთი შეხებით, ძლიერად დაარტყა მას შემდეგ, რაც ლაშა დვალმა თავით ითამაშა, მაგრამ სათანადოდ ვერ გაიტანა ბურთი საჯარიმოდან.
რომ არა VAR-ზე გადამოწმებული და გაუქმებული გოლი, დავწერდი, რომ მომდევნო რამდენიმე წამს კატასტროფული ეთქმოდა, მაგრამ ახლა მშვიდად აღვწერ იმ მომენტს - შეტევაში დაკარგული ბურთი, თურქების შესანიშნავი კონტრშეტევა მარჯვენა ფლანგიდან, ჩაწოდება საჯარიმოში და ილდიზის ზუსტი თამაში. სტადიონი ლამის გააყრუათურქი ქომაგების ყიჟინამ, თუმცა ჩვენდა საბედნიეროდ, ეპიზოდი გადამოწმდა დააღმოჩნდა, რომ გოლის ავტორი თამაშგარე მდგომარეობაში იმყოფებოდა.
30-ე წუთზე თურქებისმეკარე თამაშობს საიმედოდ, გიორგი წიტაიშვილის დარტყმა ძალიან ჰგავდა ილდიზის შეტევას. ორივე შემთხვევაში მეკარეებმა ზუსტად შეარჩიეს პოზიცია.
35-ე წუთზე კი ჩვენი ფეხბურთის ისტორიაში გამორჩეული გოლი გავიდა: გიორგი ქოჩორაშვილის ეფექტური მოქმედება მარჯვენა ფლანგზე, ჩაწოდება კარის ახლო ძელთან და გიორგი მიქაუტაძე დასწრებაზე დიდებულია - მეკარე უძლური აღმოჩნდა, 1:1! ასე გავიდა ევროპის ჩემპიონატების ფინალურ ეტაპზე პირველი ქართული გოლი.
ანგარიშის გათანაბრებას თამაშის გათანაბრებაც მოჰყვა, მეტოქეებმა რამდენიმე მომენტი გაცვალეს და მსაჯმა ერთი დამატებული წუთის შემდეგ ტაიმი დაასრულა.
მეორე ნახევრის სტარტი კი ძალიან ჰგავდა თამაშის დასაწყისს: ყველა სათამაშო კომპონენტში უპირატესობა მეტოქეს ჰქონდა. იმ წუთებში დაცვის მწყობრ თამაშს უნდა ვუმადლოდეთ, რომ თურქები ვერ დაწინაურდნენ. და კიდევ გიორგი მამარდაშვილს, რომელმაც, მაგალითად, ჰაკან ჩალჰანოღლუს უძლიერესი საჯარიმო დარტყმა მარჯვენა ხელით მოიგერია.
ქართველები ეპიზოდებში ახერხებენ თურქების ნახევარზე გადასვლას, მაგრამ თამაშში გარდატეხა ვერშეაქვთ, თამაშის დაწყებიდან საათსა და ორ წუთში კი მეტოქე კვლავ დაწინაურდა: გიორგი წიტაიშვილი ბურთის ატანისას შეცდა, მადრიდის რეალის ამომავალმა ვარსკვლავმა არდა გიულერმა კი ბრწყინვალე გოლი შეაგდო, საქართველოს ნაკრების მარჯვენა ზედაკუთხეში ჩაახვია ბურთი - 1:2. არ გადავაჭარბებ თუ ვიტყვი, რომ ეს ჩემპიონატის ერთ-ერთი ყველაზე ეფექტური გოლია.
ვესტფალენშტადიონის თითქმის ყველა ტრიბუნა თურქებითაა სავსე და ზუსტად იმ წუთებში, როცა სტადიონი ეიფორიაში იყო, გიორგი ქოჩორაშვილს სულ ცოტა დააკლდა აღტკინებული თურქი გულშემატკივრების დასამშვიდებლად: საჯარიმოში შეჭრილმა ბოლომდე იბრძოლა დამეტოქეებთან ჭიდილში დაარტყა კიდეც, ეგაა მხოლოდ, რომ ბურთი ხარიხამ აისხლიტა.
ქოჩორაშვილი ერთ-ერთი საუკეთესო იყო ჩვენი გუნდიდან და უკანასკნელ წამებზე მას კიდევ ერთხელ შეეძლო ანგარიშის გათანაბრება, მაგრამ მიქაუტაძესთან ბურთი ვერ გაიყო და... მომეჩვენა, რომ იმ მომენტში ჩვენი ნაკრების ცენტრფორვარდს რომ დარტყმა დაეთმო, ეგებ, ანგარიში გათანაბრებულიყო კიდეც.
სულ ბოლოს კი თურქეთის ნაკრების მესამე გოლი იყო. საპასუხო ბურთის იმედად მეტოქის საჯარიმოში მამარდაშვილიც ჩავიდა, თურქებმა კი უკანასკნელი შეტევა იოლად გაშალეს და აქთურქოღლუმ თამაშს წერტილი დაუსვა - 1:3.
საქართველოს ეროვნული ნაკრების დებიუტი დიდ საფეხბურთო ტურნირში მარცხით დასრულდა, მაგრამ ეს ჯერ კიდევ არაფერს ნიშნავს. ვილი სანიოლის მართლა სიმპათიურ გუნდს ამ ევროპის ჩემპიონატზე მინიმუმ ორი თამაში ელის და ბრძოლაც გრძელდება.
ზღაპრის ბოლოზე კი მოგვიანებით ვისაუბროთ. ჯერ არაფერი დასრულებულა.
ტექსტის ავტორი: adjarabetarena-ს წარმომადგენელი, პირდაპირ დორტმუნდიდან, ლაშა გოდუაძე
ნ
ნიკა შაქარაშვილი
კომენტარები