სიახლეები
სეტანტა
სპორტის გურუ
ქვიზები
Copyright © 2023 Adjarabet Arena. All Rights Reserved.
-
Aa
+
ფონტის ზომა
ეს დღეც დადგა - საქართველოს ნაკრები დამოუკიდებლობის ისტორიაში პირველად დიდ ტურნირზე, ევროპის ჩემპიონატზე წარსდგება.
დორტმუნდი, სიგნალ იდუნა პარკი, საქართველო - თურქეთი [20:00]
ბევრი ლოდინის, უამრავი იმედგაცრუების და უიღბლობის შემდეგ, ჩვენ ეს ყველაფერი დავიმსახურეთ. საქართველოს ნაკრები ვილი სანიოლთან ერთად დღეს საღამოს გერმანიის მინდვრებზე გავა და ბუკმეიკერებისთვის აუთსაიდერის როლში მეზობელ თურქეთთან შეეცდება საქმეების გარკვევას.
გუნდების გზა ევრო 2024-მდე განსხვავებული გამოვიდა - თურქეთმა საკვალიფიკაციო ეტაპი მოიგო - ხორვატიასთან, უელსთან, სომხეთთან და ლატვიასთან ჯგუფში, გუნდმა 8 მატჩში 5 გამარჯვება მოიპოვა, 2 შეხვედრა ფრედ დაასრულა და ერთადერთხელ დამარცხდა (შინ ხორვატიასთან 0:2).
საინტერესოა, თურქეთი საკვალიფიკაციო ეტაპით რომ არ გასულიყო და ერთა ლიგის იმედად დარჩენილიყო, პლეიოფის ნახევარფინალში ჩვენი მეტოქე არა ლუქსემბურგი, არამედ სწორედ თურქეთის ნაკრები იქნებოდა და გეოგრაფიული მეზობლები გერმანიაში წასვლისთვის ვიომებდით და არა უშუალოდ ევროპის ჩემპიონატზე.
ბოლო ერთი წელია, თურქეთის ეროვნულ ნაკრებს იტალიელი ვინჩენცო მონტელა წვრთნის, გუნდის სათავესი მას 8 მატჩი დაუგროვდა და სასტარტო სამ შეხვედრაში სამი გამარჯვების მოპოვების შემდეგ, წარმატებების გემო დაივიწყა - ბოლო 5 შეხვედრაში თურქეთმა 2 ფრე ითამაშა და სამჯერ დამარცხდა.
ბოლო მატჩებიდან ყველაზე მყვირალა მარტის სანაკრებო მატჩების დროს ავსტრიასთან ამხანაგურია, რომელიც გუნდმა მოულოდნელად 6:1 წააგო. რაც შეეხება ივნისის მოსამზადებელ ტესტ მატჩებს, აქ გუნდი იტალიას დაუზავდა (0:0) და პოლონეთთან დამარცხდა (1:2).
საქართველოზე ბევრს ვერც გეტყვით ახალს ისეთს, რაც აქამდე არ იცოდით. გუნდმა საკვალიფიკაციო ეტაპი ესპანეთთან, ნორვეგიასთან, შოტლანდიასთან და კვიპროსთან მე-4 ადგილზე დაასრულა და ევრო 2024-ზე თავისი სადებიუტო გზა ერთა ლიგიდან გაიკვალა, სადაც ჯერ ლუქსემბურგი დაამარცხდა (2:0), შემდეგ კი პენალტებში საბერძნეთს სძლია (0:0, 4:2).
თურქეთისგან განსხვავებით, სანიოლის გუნდმა ივნისში მხოლოდ ერთი ტესტ მატჩი ჩაატარა, მონტენეგროს ამხანაგურ შეხვედრაში 3:1 მოვუგეთ, თუმცა სამწუხაროდ კიტე დავკარგეთ, რომელსაც მას შემდეგ სრული დატვირთვით არ უვარჯიშია და დღეს თურქეთთან გამოგვაკლდება.
თუმცა, როგორც ვილი სანიოლმა პრესკონფერენციაზე დასძინა, კიტე კი დიდი დანაკლისია, მაგრამ გვყავს ფეხბურთელები, ვისაც მისი შეცვლა შეუძლია.
საქართველოს და თურქეთის ურთიერთშეხვედრების ისტორია 5 მატჩს ითვლის, საიდანაც 3 გამარჯვება თურქებმა მოიპოვეს, ერთი მატჩი ჩვენ მოვიგეთ, ერთიც კი ფრედ დასრულდა.
პირველი შეხვედრა 2002 წლით თარიღდება, როცა თურქეთში 0:3 დავმარცხდით, უკანასკნელი კი 2012-ში გაიმართა და 1:3 წავაგეთ. ჩვენი ერთადერთი გამარჯვება 2007 წელს, დინამო არენაზე მოვიპოვეთ (1:0).
სავარაუდო შემადგენლობები:
თურქეთი: გუნოკი, აიჰანი, დემირალი, ბარდაკჩი, კადიოღლუ, ოზჩანი, ჩალჰანოღლუ, გიულერი, ილდიზი, არტუკოღლუ, ილმაზი
საქართველო: მამარდაშვილი, კვერკველია, კაშია, დვალი, კაკაბაძე, კვეკვესკირი, ქოჩორაშვილი, შენგელია, ჩაკვეტაძე, კვარაცხელია, მიქაუტაძე.
ჩვენი პროგნოზი: საქართველო მძიმე ბრძოლაში მოახერხებს და ბელგია - სლოვაკეთის შემდეგ, მეორე სენსაციას მოახდენს ტურნირზე. დღეს აუცილებლად ვიგებთ!
ნ
ნიკა შაქარაშვილი
კომენტარები