ნიუკასლმა პრემიერ ლიგაში მარცხისთვის ჩელსიზე შური იძია და ტურნირიდან გააგდო

კარაბაო თასის 1/8 ფინალში ნიუკასლმა ჩელსი დაამარცხა.

მატჩი სენტ ჯეიმს პარკზე გაიმართა და მასპინძელთა გამარჯვებით 2:0 დასრულდა.

ენცო მარესკამ მოედანზე სათასო შემადგენლობა გამოიყვანა, რომელსაც უფრო ხშირად ევროპა ლიგაზე იყენებს ხოლმე. გუნდის ლიდერებმა - კოულ პალმერმა, ნიკოლას ჯექსონმა და რობერტ სანჩესმა დასვენების საშუალება მიიღეს, მოედანზე კი კრისტოფერ ნკუნკუ, ჟოაო ფელიქსი და სხვები ვიხილეთ.

ამან ჩელსის ვერ უშველა - გუნდმა პირველ ტაიმში ორი სწრაფი გოლი გაუშვა (23' ისაკი, 26' დისასის ავტოგოლი) და ანგარიშის გათანაბრება ვეღარ მოახერხა.

ამრიგად, ნიუკასლმა რამდენიმე დღის წინ, სტემფორდ ბრიჯზე პრემიერ ლიგის მატჩში მარცხის (1:2) გამო ჩელსიზე შური იძია და ტურნირიდან გამოაგდო, თავად კი 1/4 ფინალისკენ გაეშურა.