სიახლეები
სეტანტა
სპორტის გურუ
ქვიზები
Copyright © 2023 Adjarabet Arena. All Rights Reserved.
3 თვის წინ · 0 წთ წასაკითხად
-
Aa
+
ფონტის ზომა
ევრო 2024-ს 1/4 ფინალური შეხვედრა პორტუგალია - საფრანგეთი ერთი საინტერესო პირადი დაპირისპირებითაც არის გამორჩეული.
კილიან მბაპე დღეს საღამოს თავის ბავშვობის კუმირს, კრიშტიანუ რონალდუს დაუპირისპირდება, რომლის პოსტერებითაც მთელი ოთახი ჰქონდა გადაჭრელებული.
მადრიდის რეალის წარსული მადრიდის რეალის აწმყოს წინააღმდეგ - ასე შეიძლება დაასათაურო აღნიშნული დაპირისპირება, სადაც უბრალოდ მბაპე და რონალდუ კი არ შეხვდებიან ერთმანეთს, ეს არის თანამედროვეობის ერთ-ერთი მთავარი ვარსკვლავების შერკინებაც.
"რაც რონალდუმ რეალში გააკეთა განუმეორებელი და უნიკალურია, მაგრამ მე არ მინდა, რომ მისი ისტორიის გამგრძელებელი დამიძახონ. ჩემი სურვილია, ოცნების გუნდში ჩემი პირადი ისტორია დავწერო და სწორედ ამას ვეცდები." - აღნიშნა გუშინდელ პრესკონფერენციაზე ფრანგმა ფეხბურთელმა.
თუმცა, ჯერ მადრიდამდე შორია, ახლა უფრო ევროპის ჩემპიონატზე უნდა ვილაპარაკოთ, სადაც არცერთს არ აქვს მაინც და მაინც გამორჩეული ევრო. კრიშტიანუ რონალდუ სარეკორდო მე-6 ტურნირს თამაშობს, თუმცა გოლი ჯერ არ გაუტანია - ყველაზე რეალური შანსი ჯერ თურქეთთან ჰქონდა, როცა ერთი ერთზე გასულმა ბრუნოს ცარიელ კარზე დაუგორა, შემდეგ კი იყო 1/8 ფინალი და პენალტი სლოვენიასთან, როცა იან ობლაკმა წერტილიდან კრიშტიანუს გეგმა კარგად წაიკითხა და ბრწყინვალე სტილში შეძლო მისი დარტყმულის მოგერიება.
რაც შეეხება მბაპეს, მან ავსტრიასთან პირველი ტურის მატჩში ცხვირი გაიტეხა, ნიდერლანდებთან თამაში გამოტოვა, პოლონეთიდან მოყოლებული კი ნიღბით თამაშობს. თუ მას თავად დავუჯერებთ, ნიღბით თამაში საშინელებაა - ერთის მხრივ, მას პერიფერიულ მხედველობაში უშლის ხელს, მეორეს მხრივ კი, სახე ორმაგად უოფლიანდება და მუდმივად მოხსნა უწევს გასაწმენდად. თავისი ერთადერთი გოლი ამ ევროზე (და ზოგადად ევროპის ჩემპიონატებზე) მან პოლონეთს, პენალტიდან გაუტანა.
შესაბამისად, დღეს რომელი ფეხბურთელიც გავარდება, თუ მაინც და მაინც მბაპეს 2022 წლის მუნდიალის ფინალის პერფომანსი არ აჩვენა, მისთვის ევრო 2024 ჩაგდებული იქნება - ჯერ ერთი რომ პორტუგალიასაც და საფრანგეთსაც ფავორიტებს შორის მოიხსენიებდნენ და 1/4 ფინალში გამოვარდნა უკვე ჩავარდნაა, მაგრამ მბაპესგან და რონალდუსგანაც ხალხი გაცილებით მეტს ელოდა და ვინ იცის, იქნებ ერთმანეთისთვის ისინი კარგი მოტივატორები აღმოჩნდნენ.
შეიძლება ცალკეულად როგორც სახელებს არა, მაგრამ ამ ტურნირზე მბაპესაც და რონალდუსაც ბევრი აქვს დასამტკიცებელი და ეჭვგარეშეა, რომ ორივე ფეხბურთელი დღეს ათმაგი მოტივაციით გამოვა მოედანზე და გოლის გატანის უდიდესი სურვილი ექნება.
საფეხბურთო მოედანზე მბაპე და კრიშტიანუ რონალდუ ერთმანეთს აქამდე 4-ჯერ დაუპირისპირდნენ და ფრანგს ჯერ საკუთარი კუმირის გუნდის წინააღმდეგ გოლი არ გაუტანია - 2017/18 სეზონში, რეალი და პსჟ ჩემპიონთა ლიგაზე შეხვდნენ ერთმანეთს, პირველი მატჩი მადრიდში რეალმა 3:1 მოიგო (რონალდუმ დუბლი შეასრულა), საპასუხო კი პარიზში მადრიდელებმა 2:1 მოიგეს და იქაც, რონალდუმ თავის გამოჩენა მოახერხა.
2020/21 სეზონში გუნდებმა ორი ფრე ითამაშეს - ჯერ ერთა ლიგაზე (0:0), შემდეგ კი ევროზე (2:2), სადაც შოუ რონალდუმ და ბენზემამ მოიპარეს ორ-ორი გატანილი გოლით.
ასე რომ, რონალდუს გუნდების წინააღმდეგ გამართულ 4 მატჩში მბაპეს 2 ფრე და 2 მარცხი აქვს, პირადად კი მხოლოდ ერთი ასისტის ჩაწერა მოახერხა.
რაც შეეხება კრიშტიანუს, მან მბაპეს გუნდებს 4 მატჩში 5 გოლი გაუტანა და ერთიც თანაგუნდელს გაატანინა.
ნ
ნიკა შაქარაშვილი
კომენტარები