სიახლეები
სეტანტა
სპორტის გურუ
ქვიზები
Copyright © 2023 Adjarabet Arena. All Rights Reserved.
-
Aa
+
ფონტის ზომა
ევრო 2024-ზე ტურნირის ერთ-ერთი საუკეთესო დღე გველოდება - დღეს 1/4 ფინალური მატჩები იწყება და პირდაპირ ორ ცენტრალურ შეხვედრას ვიხილავთ.
ესპანეთი - გერმანია [20:00]
ბევრის აზრით, ტურნირის ორი საუკეთესო გუნდი და ეს 1/4 ფინალი ნაადრევი ფინალიც კი არის. ესპანეთის და გერმანიის ფინალში ხილვა ახალი ამბავი არც არავისთვის იქნებოდა, რადგან ამ საუკუნეში მსგავსი რამ უკვე ვიხილეთ, როცა 2008-ში ესპანეთმა გერმანიას გადამწყვეტი მატჩი ფერნანდო ტორესის გოლით, 1:0 მოუგო.
ისე კი, ყველა ეპითეტთან ერთად, ამ მატჩის შესახებ ყველაფერს ის ფაქტიც ამბობს, რომ ესპანეთი და გერმანია - ევროპის ჩემპიონატების ისტორიაში ყველაზე ტიტულოვანი ნაკრებები არიან 3-3 ტიტულით.
ესპანეთმა იდეალური ჯგუფური ეტაპი ჩაატარა, პირველ ტურში კერკეტი ხორვატია 3:0 გაანადგურა, შემდეგ ანგარიშით იმდენად არა, მაგრამ თამაშით შანსი არ დაუტოვა იტალიას (1:0), ბოლო ტურში კი, როცა პირველი ადგილიც კი განაღდებული ჰქონდა, გადახალისებული შემადგენლობით ალბანეთს 1:0 მოუგო.
პირველი გოლი ფურია როხას ამ ტურნირზე საქართველოს ნაკრებმა გაუტანა, რომელიც, სამწუხაროდ, ჩვენი გუნდისთვის მოსაგებად საკმარისი არ აღმოჩნდა და 1:4 დავმარცხდით. სწორედ ასე მოვიდა ლუის დე ლა ფუენტეს გუნდი 1/4 ფინალამდე - პრაქტიკულად, ყველანაირი კითხვის ნიშნების გარეშე.
გერმანიამ პირველ ორ ტურში ესპანეთზე უკეთესი თუ არა, არანაკლები შთაბეჭდილება დატოვა. თუმცა, პირველი კითხვები ჯგუფური ეტაპის მე-3 ტურში გაჩნდა, როცა ნაგელსმანის გუნდმა პირველი ადგილი ჯგუფში ბოლო წამებზე, ფულკრუგის შვეიცარიასთან გამათანაბრებელი გოლის წყალობით შეინარჩუნა. ვინ იცის, იქნებ ბუნდესნაკრებისთვის მე-2 ადგილიც ჯობდა, რადგან პირველმა ადგილმა გუნდი ბადის რთულ მხარეში მოახვედრა. თუმცა, ეს ცალკე სალაპარაკო თემაა.
უფრო მეტი პრობლემა გამოჩნდა მერვედფინალში. ერთი შეხედვით, თითქოს მარტივი გამარჯვება 2:0, მაგრამ დრამა არც დანიასთან შეხვედრას აკლდა - დანიელთა მცველი ანდერსენი წუთნახევარში გმირიდან ანტიგმირამდე ჩამოქვეითდა. ჯერ გაიტანა, მაგრამ გოლი მილიმეტრიანი თამაშგარის გამო გაუქმდა, რომელშიც, ის თავად კი არა, მისი თანაგუნდელი მოხვდა. შემდეგ კი, გაუქმებული გოლით გახარებული გერმანია შეტევაში რომ წამოვიდა, საჯარიმოში ხელზე ბურთი სწორედ იმავე ანდერსენს მოხვდა და პენალტი დაინიშნა, რომელიც კაი ჰავერცმა უზადოდ შეასრულა და მასპინძლებს მნიშვნელოვანი უპირატესობა მოუტანა. ორმაგი შოკის შემდეგ დანიამ გონს მოსვლა ვერ მოახერხა და ბოლოს ისიც გაუმართლა, რომ საერთოდ 0:3 არ წააგო.
ესპანეთისა და გერმანიის ურთიერთშეხვედრების ისტორია ძალიან მდიდარია - 26 მატჩისგან შედგება და თითქმის სრული თანაფარდობაა. 9 გამარჯვება გერმანელებმა მოიპოვეს, 8 - ესპანელებმა, კიდევ 9 მატჩი კი ფრედ დასრულდა. თანაფარდობაა გატანილი გოლების მხრივაც - 32 ესპანეთს, 31 გერმანიას.
უკანასკნელი დაპირისპირება 2022 წლის მუნდიალის ჯგუფში შედგა და ფრედ 1:1 დასრულდა, იქამდე, 2020 წლის ერთა ლიგაზე ესპანეთმა სენსაციურად 6:0 მოიგო. გერმანელების ბოლო გამარჯვება კი 2014 წლით თარიღდება, როცა უკვე მსოფლიო ჩემპიონმა გერმანიამ ნოემბრის ამხანაგური შეხვედრა 1:0 მოიგო.
სავარაუდო შემადგენლობები
ესპანეთი: სიმონი, კარვახალი, ლე ნორმანი, ლაპორტი, კუკურელია, პედრი, როდრი, ფაბიან რუისი, იამალი, ნიკო უილიამსი, მორატა
დისკვალიფიკაციის ზღვარზეა: კარვახალი, ლე ნორმანი, მორატა, ვივიანი.
გერმანია: ნოიერი, კიმიხი, რუდიგერი, ტა, რაუმი, ანდრიხი, კროოსი, მუსიალა, გიუნდოგანი, ვირცი, ჰავერცი
დისკვალიფიკაციის ზღვარზეა: ანდრიხი, მიტელსტადტი, რუდიგერი.
ჩვენი პროგნოზი: ორივე გუნდი მოახერხებს გოლის გატანას.
პორტუგალია - საფრანგეთი [23:00]
არანაკლებ საინტერესო შეხვედრას ვიხილავთ ღამის სესიაზე, როცა საფრანგეთის ნაკრები და ნიღბიანი კილიან მბაპე კრიშტიანუ რონალდუს და პორტუგალიის ნაკრებს დაუპირისპირდებიან. მართალია, დიდიე დეშამის პრაგმატულობა არ გვაძლევს იმის იმედს, რომ ესეც გახსნილი და ლაღი მატჩი იქნება, მაგრამ სახელებით ეს შეხვედრაც შეიძლება ფინალის ტოლფასად მივიჩნიოთ, მითუმეტეს, რომ ესპანეთი - გერმანიის მსგავსად, ესეც ერთ-ერთი ევროს ფინალის გამეორებაა - 2016-ში სწორედ ეს ორი გუნდი დაუპირისპირდნენ ერთმანეთს გადამწყვეტ მატჩში და მაშინ გამარჯვება საფრანგეთიდან პორტუგალიელებმა წამოიღეს.
უცნაურია მაგრამ ფაქტია, რომ საფრანგეთი 1/4 ფინალამდე ისე მოვიდა, ჯერაც არ გაუტანია გოლი თამაშიდან. ავსტრიას დეშამის გუნდმა ავტოგოლით მოუგო, მეორე ტურში ნიდერლანდებთან ფრე 0:0 ითამაშა, ჯგუფის დასკვნით შეხვედრაში კი პოლონეთის კარი კილიან მბაპემ პენალტით აიღო, თუმცა ეს გუნდისთვის გამარჯვებისთვის საკმარისი არ აღმოჩნდა.
1/8 ფინალში ფრანგები ბელგიას დაუპირისპირდნენ და იქაც, მატჩის ბედი ვერტონგენის ავტოგოლმა გადაწყვიტა - რომ არა ვეტერანი მცველის შეხება, ბურთი სრულიად სხვა მიმართულებით მიდიოდა, მატჩი კი, აშკარად დამატებითი დროისკენ.
პორტუგალიამ ევრო 2024 ჩეხეთთან უმძიმესი გამარჯვებით დაიწყო, სადაც ჩეხები 1:0-ს იგებდნენ, თუმცა ბოლო წუთებზე პორტუგალიელებმა მატჩის ბედი შემოატრიალეს და 2:1 მოიგეს.
მეორე ტურში იყო მარტივი გამარჯვება (3:0) თურქეთთან, ჯგუფის ბოლო შეხვედრაში კი, საქართველოსთან, რობერტო მარტინესმა რამდენიმე ლიდერი დაასვენა და ეს მძიმედ დაუჯდა - კვარაცხელიას და მიქაუტაძის გოლებით საქართველომ ისტორიული გამარჯვება (2:0) მოიპოვა და ჯგუფიდან მე-3 ადგილით გავიდა.
1/8 ფინალში პორტუგალიელთა მეტოქე სლოვენია იყო, რომელიც მოედანზე პირველ რიგში საკუთარი თავის დასაცავად გამოვიდა და ეს იდეალურადაც გამოსდიოდა. ექსტრა-ტაიმში პორტუგალიელებმა პენალტი მოიპოვეს, თუმცა წერტილიდან იან ობლაკმა კრიშტიანუ რონალდუს აჯობა და თავის გუნდს მატჩი პენალტების სერიამდე მიაყვანინა.
სერიაში კი მთავარ გმირად რონალდუს და მთელ პორტუგალიას გოლკიპერი კოშტა მოევლინა, რომელმაც ზედიზედ 3 თერთმეტმეტრიანი მოიგერია და ევროპის ჩემპიონატების ისტორიაში პირველი მეკარე გახდა ამ მიღწევით.
პორტუგალიის და საფრანგეთის ურთიერთშეხვედრების ისტორია 28 მატჩს ითვლის. ფრანგებმა 19 მოიგეს, პორტუგალიელებმა 6, ხოლო 3 შემთხვევაში გამარჯვებული არ გამოვლენინა.
ბოლო დაპირისპირება ევრო 2020-ზე ჯგუფში შედგა, როცა ბენზემას და რონალდუს დუბლებით მატჩი ფრე 2:2 დასრულდა. ფრანგების ბოლო გამარჯვება 2020 წლით თარიღდება (1:0), პორტუგალიამ კი საფრანგეთთან ბოლოს სწორედ 2016 წლის ფინალში მოიგო და ბოლო გოლიც ფრანგებს სწორედ მაშინ გაუტანა.
სავარაუდო შემადგენლობები
პორტუგალია: დიოგუ კოშტა, კანსელო, რუბენ დიაში, პეპე, ნუნო მენდეში, პალინია, ვიტინია, ბრუნო ფერნანდეში, ბერნარდო სილვა, კრიშტიანუ რონალდუ
დისკვალიფიკაციის ზღვარზეა: კანსელო, რონალდუ, კონსეისაუ, პალინია, პედრო ნეტო, რუბენ ნევეში.
საფრანგეთი: მენიო, კუნდე, სალიბა, უპამეკანო, ტეო ერნანდესი, კანტე, ჩუამენი, გრიზმანი, დემბელე, ტურამი, მბაპე
დისკვალიფიცირებულია: რაბიო
დისკვალიფიკაციის ზღვარზეა: დემბელე, გრიზმანი, მბაპე, ჩუამენი.
ჩვენი პროგნოზი: 2.5-ზე ნაკლები გოლი.
ნ
ნიკა შაქარაშვილი
კომენტარები