გალათასარაი - ყველაფერი, რაც კლუბის შესახებ უნდა იცოდე

გალათასარაი თურქული საფეხბურთო კლუბია, რომელიც ქალაქ სტამბოლის ევროპულ მხარეს წარმოადგენს. კლუბი 119 წლის წინ, 1905 წლის ოქტომბერში დაარსდა.

გალათასარაი იმ 3 გუნდიდან ერთ-ერთია, რომელსაც თურქეთის სუპერ ლიგის ყველა სეზონში აქვს მონაწილეობა მიღებული 1959 წლიდან მოყოლებული.

გალათასარაის ყველაზე მეტი სუპერ ლიგა (24), თურქეთის თასი (18) და თურქეთის სუპერ თასი (17) აქვს მოგებული, რაც ქვეყანაში ყველაზე წარმატებულ საფეხბურთო კლუბად აქცევს.

გალათასარაი არის ევროპულ ტურნირებზე ყველაზე წარმატებული თურქული კლუბიც. გუნდმა 2000 წელს უეფას თასი და უეფას სუპერ თასი მოიგო, რითიც გახდა პირველი და აქამდე ერთადერთი თურქული გუნდი, რომელმაც უეფას ტურნირი მოიგო. იმავე წელს გუნდმა ტრებლიც შეასრულა და უეფას თასთან ერთად სუპერ ლიგასა და თურქეთის თასსაც დაეუფლა. გალათასარაი მე-20 საუკუნის საუკეთესო თურქულ კლუბად არის აღიარებული.

საფეხბურთო გუნდი სტამბოლის რამს პარკზე თამაშობს, რომლის ტევადობაც 54 ათასი ადამიანია.

კლუბის ისტორიულ მეტოქეებად სტამბოლის სხვა გუნდები, ბეშიქთაში და ფენერბაჰჩე მიიჩნევიან. გალათასარაისა და ფენერბაჰჩეს შორის დაპირისპირებას მათი სტადიონების ადგილმდებარეობის გამო ინტერკონტინენტურ დერბისაც უწოდებენ. გალათასარაი სტამბოლის ევროპულ მხარეს წარმოადგენს, ფენერბაჰჩე კი - აზიურს.

რეკორდები

გალათასარაის გულშემატკივრებმა სპორტულ სტადიონზე ხმაურის რეკორდი 2011 წლის 18 მარტს მოხსნეს. სტამბოლის რამს პარკზე დაფიქსირებული ხმის მაჩვენებელი 140.76 დეციბელი იყო.

2024 წლის 12 მაისს გალათასარაიმ ქარაგიუმრიუქის 3-2 დამარცხებით თურქეთის სუპერ ლიგის ისტორიაში მოგებათა სერიის რეკორდი მოხსნა და ზედიზედ მე-17 მატჩი მოიგო.

გალათასარაის ყველა დროის საუკეთესო ბომბარდირი მეთინ ოქთაია, რომელმაც 405 მატჩში 349 გოლის გატანა შეძლო. ლეგიონერი ბომბარდირი რუმინელი გეორგე ჰაჯია, რომლის ანგარიშზეც 192 მატჩში 72 გოლია.

კლუბის ისტორიაში ყველაზე მეტი ოფიციალური მატჩი ბიულენთ ქორქმაზს აქვს ჩატარებული (593), ლეგიონერებს შორის ყველაზე მეტი მატჩი კი ურუგვაელ ფერნანდო მუსლერას (507) ანგარიშზეა.

კლუბის ისტორიაში ყველაზე ტიტულოვანი ფეხბურთელი ასევე ბიულენთ ქორქმაზია 23 ტიტულით.

კლუბმა ორივე სატრანსფერო რეკორდი 2024 წელს დაამყარა - თურქებმა ნორვიჩიდან გაბრიელ სარა 18 მილიონ ევროდ იყიდეს, საშა ბოეი კი ბაიერნში 30 მილიონად გაყიდეს.

კლუბის ისტორიაში ყველაზე წარმატებული მწვრთნელი ფათიჰ თერიმია, რომელმაც გალათასარაის 17 ტიტული მოაგებინა. ყველაზე მეტ ოფიციალურ მატჩშიც (558) სწორედ თერიმს ჰყავს გუნდი გაყვანილი,

გალათასარაის მატჩზე დასწრების რეკორდი 2002 წლის 31 ივლისს ოლიმპიაკოსთან შეხვედრაში დაფიქსირდა - ათათურქის ოლიმპიურ სტადიონზე თამაში 79,414-მა ადამიანმა იხილა.

2024/25 სეზონი

2024/25 წლების სეზონში გალათასარაი უეფას ევროპა ლიგაზე და თურქეთის სუპერ ლიგაში დაუმარცხებელია. ევროპა ლიგაზე გუნდი 4 მატჩის შემდეგ 10 ქულით მე-3 ადგილზეა. სუპერ ლიგაში კი - 10 მოგება, 1 ფრე და 31 ქულით პირველი ადგილი. მდევარი ფენერბაჰჩე 5 ქულაშია.

ამ სეზონში გუნდის ბომბარდირი ვიქტორ ოსიმენია, რომელიც თურქეთში ნაპოლიდან იჯარის წესით იმყოფება.