რეალმაც მოიგო - ესპანეთის სუპერთასის ფინალში კლასიკო გაიმართება

ესპანეთის სუპერთასის მეორე ნახევარფინალში მადრიდის რეალმა მალიორკა დაამარცხა.

შეხვედრა უკვე ტრადიციულად საუდის არაბეთში გაიმართა და მადრიდელთა გამარჯვებით 3:0 დასრულდა.

პირველი უგოლო ტაიმის შემდეგ, რეალმა საწადელს მეორე ნახევარში მიაღწია და კერკეტი მალიორკა მაინც გატეხა - 63-ე წუთზე საჯარიმოში არეულობით ბელინგემმა ისარგებლა და ანგარიში გახსნა.

90+2 წუთზე ბრაჰიმ დიასის პასის შემდეგ მალიორკას ფეხბურთელმა ბურთი საკუთარ კარში ჩაჭრა, კიდევ ორ წუთში კი საბოლოო ანგარიში ლუკას ვასკესის კარგი პასის შემდეგ როდრიგომ დააფიქსირა.

ამრიგად, რეალი სუპერთასის ფინალში ბარსელონას შეუერთდა და გუნდები ზედიზედ მეორედ გაარკვევენ საქმეს ამ ტურნირის გადამწყვეტ მატჩში - გასულ სეზონში რეალმა 4:1 იმარჯვა.

გადამწყვეტი დაპირისპირება კვირას, 12 იანვარს, 23:00 საათზე გაიმართება.