სალაჰი რეკორდების მოხსნას აგრძელებს

ინგლისის პრემიერ ლიგის 29-ე ტურის წინასწარ ჩატარებულ მატჩში ლივერპული ასტონ ვილას ესტუმრა, შეხვედრა ფრედ 2-2 დასრულდა.

მერსისაიდელთა მხრიდან გამორჩეული იყო მოჰამედ სალაჰი, რომელმაც პირველი გოლი თავად გაიტანა, მეორე შემთხვევაში კი ტრენტ ალექსანდერ-არნოლდს საგოლე გადაცემა გაუკეთა.

ეგვიპტელი 2014-15 წლების სეზონის შემდეგ გახდა პირველი ფეხბურთელი ევროპის ტოპ 5 ლიგაში, რომელმაც 10 სხვადასხვა მატჩში შეძლო გოლის გატანა და საგოლე გადაცემის გაკეთება. 10 წლის წინ ეს ლიონელ მესიმ გააკეთა 11 განსხვავებულ შეხვედრაში.

სალაჰი ასევე გახდა მე-4 მოთამაშე, რომელსაც ევროპის ტოპ 5 ლიგის ბოლო 10 სეზონში 100 საგოლე გადაცემა დაუგროვდა.

კევინ დე ბრუინი - 117

ტომას მიულერი - 116

ლიონელ მესი - 110

მოჰამედ სალაჰი - 100

ასევე ეგვიპტელი არის 2018-19 წლების სეზონის შემდეგ პირველი ფეხბურთელი, რომელმაც სეზონში 15+ გოლისა და 15+ ასისტის დაგროვება შეძლო. იმ სეზონში ეს ედენ აზარმა შეძლო.

პრემიერ ლიგაში ჩატარებული 26 მატჩის შემდეგ ლივერპულს 61 ქულა აქვს და სატურნირო ცხრილს 8-ქულიანი უპირატესობით ლიდერობს.

მოჰამედ სალაჰი კი როგორც ბომბარდირთა დავას (24 გოლი), ისე ასისტენტთა სიას (15 საგოლე გადაცემა) ლიდერობს.