ბარსელონას ყოფილმა პრეზიდენტმა, ხოსეპ მარია ბართომეუმ „Cadena SER“-თან ინტერვიუში გაამხილა, თუ რაოდენ ახლოს იყო კლუბი ლიონელ მესის დაკარგვასთან.
ნეიმარის პსჟ-ში სკანდალური გადასვლის შემდეგ, კატალონიურ კლუბში პანიკა დაიწყო, რადგან გავრცელდა ინფორმაცია, რომ ერთ-ერთი კლუბი მზად იყო მესის გამოსასყიდი პუნქტი, 400 მილიონი ევრო, სრულად დაეფარა.
საიდუმლო მყიდველი და არაბული ფული
ბართომეუს თქმით, ფინანსური ოპერაცია სახელმწიფო დონეზე იყო დაგეგმილი: „არაბული ქვეყნიდან ფული ევროპულ ანგარიშებზე უკვე გადარიცხული იყო“. ყოფილმა პრეზიდენტმა კატეგორიულად უარყო, რომ საუბარი მანჩესტერ სიტიზე იყო, რითაც სპეკულაციების ახალი ტალღა ააგორა. ვინაიდან იმ პერიოდში ფინანსური რესურსებით მხოლოდ რამდენიმე კლუბი თუ გამოიჩეოდა (მათ შორის ჩელსი, პსჟ ან თავად არაბული კლუბები), მყიდველის ვინაობა კვლავ გამოცანად რჩება.
პანიკა კამპ ნოუზე და „700-მილიონიანი პუნქტი“
ამ საფრთხემ ბარსელონას ხელმძღვანელობა იძულებული გახადა, მყისიერი ზომები მიეღო. მესისთან და მის მამასთან გამართული მოლაპარაკებების შედეგად, კლუბმა ლიონელის გამოსასყიდი პუნქტი 400-დან 700 მილიონ ევრომდე გაზარდა.
„თუ გამოსასყიდ პუნქტს ზრდი, ვალდებული ხარ, მოთამაშის ხელფასიც გაზარდო,“ - განმარტა ბართომეუმ.
ამ ნაბიჯმა მესის გადაბირების მცდელობა დროებით შეაჩერა, თუმცა, როგორც შემდგომში გამოჩნდა, მესის კონტრაქტის ასეთმა მკვეთრმა გაუმჯობესებამ კლუბის ფინანსური კრიზისი კიდევ უფრო გააღრმავა, რამაც საბოლოოდ 2021 წელს ლეგენდის კლუბიდან წასვლა გამოიწვია.
ბართომეუს ეს განცხადება ადასტურებს, რომ იმ პერიოდში ბარსელონა რეალურ საფრთხეს გრძნობდა. თუმცა, იმის დაზუსტება, თუ ვინ იყო ის „საიდუმლო მყიდველი“, რომელიც მესის წაყვანას ცდილობდა, კვლავ ბურუსითაა მოცული.
