დანი ალვეში გაკოტრდა?

დანი ალვეშისა და მისი მეუღლის, ხოანა სანსის ირგვლივ მორიგი სკანდალი გორდება.

გავრცელებული ჭორების თანახმად, ბრაზილიელი ფეხბურთელი სერიოზულ ფინანსურ კრიზისშია და შესაძლოა გაკოტრების პირასაც იყოს. ეჭვები მას შემდეგ გაჩნდა, რაც მოდელმა სოციალურ ქსელში სპეციალური გვერდი შექმნა და საკუთარი მდიდრული გარდერობის უდიდესი ფასდაკლებით გაყიდვა დაიწყო.

სანსის კოლექციაში მსოფლიოს წამყვანი მოდის სახლების უძვირფასესი ნივთები მოხვდა, თუმცა გასაოცარი მათი ამჟამინდელი ფასია. მაგალითად, Chanel-ის ჯინსის ქურთუკი, რომელშიც მოდელმა 6000 ევრო გადაიხადა, ახლა 2900 ევროდ იყიდება. Balenciaga-ს წითელი სვიტერი 950 ევროს ნაცვლად 300 ევროდ არის შეფასებული, ხოლო Isabel Marant-ის სრულიად ახალ, ჩაუცმელ ფეხსაცმელს 890 ევროს ნაცვლად 300 ევროდ იძლევიან.

ფასდაკლების სიაში სხვა პრემიუმ ბრენდებიც აღმოჩნდა. Louis Vuitton-ის სპორტული ფეხსაცმელი, რომელიც ადრე 1100 ევრო ღირდა, ახლა 400 ევროდაა ხელმისაწვდომი, ზუსტად ამავე ფასად იყიდება Gucci Flashtrek-ის მოდელიც (საწყისი ფასი - 1200 ევრო). ჯამში, მხოლოდ ამ ხუთი ნივთის ორიგინალური ღირებულება 10 000 ევროს აღემატება, თუმცა მოდელი მათ დაახლოებით 4300 ევროდ თმობს.

ეს მოულოდნელი ონლაინ-გაყიდვები ხოანა სანსის კარიერულ ცვლილებებსაც ემთხვევა. 2024 წელს მოდელმა განაცხადა, რომ პოდიუმს დროებით ტოვებდა და მოდის ინდუსტრიაში სხვა, ნაკლებად საჯარო პროექტებზე ფოკუსირებას გეგმავდა. მიუხედავად ამისა, გარდერობის ასეთი მასშტაბით გასხვისებამ საზოგადოებაში ალვეშის ოჯახის ფინანსურ კოლაფსზე საუბრები კიდევ უფრო გაამძაფრა.