5 დღის წინ · 0 წთ წასაკითხად
-
Aa
+
ფონტის ზომა
დანი ოლმოს აგენტმა, ენდი ბარამ მოთამაშის გარშემო არსებულ სიტუაციაზე ისაუბრა.
"დანის გრძნობები? ეს სტრესული სიტუაციაა მისთვის, როგორც სხვა ნებისმიერი მოთამაშისთვის იქნებოდა, მაგრამ ის დიდებული ფეხბურთელი და ადამიანია, ცდილობს, რომ მშვიდად იყოს. რა თქმა უნდა, დანი გამარჯვებულია, მას თამაში უყვარს და არა მისი ყურება.
შემიძლია დავადასტურო, რომ პოზიცია არ შეგვიცვლია. სხვა კლუბს არ ვესაუბრებით. დანი ბარსას მოთამაშეა და უნდა, რომ ასეც დარჩეს. მან დიდი ძალისხმევა გასწია თავის ცხოვრებაში, რომ ბარსელონაში ყოფილიყო. ეს მისი სურვილი იყო დიდი ხნის განმავლობაში.
სხვა ვარიანტები? ბარსელონა პირველი და უკანასკნელი ვარიანტია. დანი, მამამისი, ოჯახი და მე სხვა ვარიანტებზე არ ვფიქრობთ.
დიდი ფული უფასო ტრანსფერის შემთხვევაში? რა თქმა უნდა, საუკეთესო გარიგებები მაშინ ხდება, როცა მოთამაშეები უფასოდ გადადიან, მაგრამ ემოციებსაც თავისი მნიშვნელობა აქვს. ჩვენ არასდროს მიგვიღია კარიერული გადაწყვეტილება ფულისთვის.
დანი ფეხბურთს იმიტომ თამაშობს, რომ მას ეს უყვარს. ის ბევრს ეცადა, რომ ბარსაში ყოფილიყო. მეც ბედნიერი ვარ, რომ ის აქ არის, ერთ-ერთი საუკეთესო მოთამაშე მსოფლიოში ერთ-ერთ უდიდეს კლუბშია.
როცა დანი დინამო ზაგრებში იყო, ბაიერნმა დიდი ფული შემოგვთავაზა, მარკეტინგულადაც უფრო მომგებიანი იყო, მაგრამ ჩვენ ლაიფციგს სიტყვა მივეცით, მათ პროექტი გვაჩვენეს და მაშინ გადავწყვიტეთ, რომ ლაიფციგში წავსულიყავით. ეს სპორტული პროექტის ამბავია. ფული ყველაფერი არ არის ცხოვრებასა და ფეხბურთში.
ჩვენ პრეზიდენტ ლაპორტასა და დეკუს პატივს ვცემთ. მათ დიდი ძალისხმევა გაიღეს დანის მოყვანაში გასულ ზაფხულს. ჩვენ მოგვწონს მათი პროექტი, რომელიც შემდეგ წლებში ერთ-ერთი საუკეთესო იქნება მსოფლიოში.
ჩვენ სრულად გვჯერა, რომ ბარსა მომავალში ყველა ტიტულს მოიგებს, როგორც ამას მესის ეპოქის დროს აკეთებდნენ. მოთამაშეს, ოჯახს, მე... ყველას გვსურდა დანი ბარსაში.
ლა ლიგის განცხადება? გულწრფელად რომ ვთქვა, წყნარად ვარ. მე მჯერა პრეზიდენტ ლაპორტასი და დეკუსი. ვგრძნობ, რომ ისინი გამოსავალს მოძებნიან დანისთვის. ეს დიდი კლუბია.
ლა ლიგა უნდა დაეხმაროს მათ. დარწმუნებული ვარ, რომ ის ბარსაში ბევრი წელი იქნება, ის აქ ბედნიერია და მისი სურვილი აქ დარჩენაა." - ისაუბრა ესპანელის აგენტმა GiveMeSport-თან.
შეგახსენებთ, რომ ლა ლიგა ბარსელონას დანი ოლმოს დარეგისტრირების საშუალებას ჯერ-ჯერობით არ აძლევს.
თ
თაზო ჩარკვიანი
კომენტარები
