დასანანი მარცხი - სულამანიძე ვერცხლის პრიზიორია

პარიზის 2024 წლის ოლიმპიადაზე ძიუდოში კაცთა -100 კგ. წონით კატეგორიაში საქართველოს ღირსება ილია სულამანიძემ დაიცვა.

ქართველი ფინალში აზერბაიჯანის სახელით მოასპარეზე ზელიმ კოცოიევს დაუპირისპირდა.

ილია ფინალს ვაზარით იგებდა, თუმცა გაფრთხილებების გამო შეხვედრა ბოლომდე ვერ მიიყვანა და 3 შიდოთი დამარცხდა. 

სულამანიძემ სადებიუტო ოლიმპიადაზე ვერცხლის მედალი მოიპოვა.

ეს საქართველოს დელეგაციისთვის პარიზში მე-3 მედალია. ტატო გრიგალაშვილის ვერცხლსა და ლაშა ბექაურის ოქროს, ილია სულამანიძის ვერცხლიც დაემატა.

ილიამ თავის სადებიუტო ოლიმპიადაზე ასპარეზობა 1/8 ფინალიდან დაიწყო. მისი მეტოქე იტალიელი ჯენარო პირელი იყო. ქართველმა პირველ შეხვედრაში მეტოქე 2 წუთში იპონით დაამარცხა და 1/4 ფინალში სწორედ ასე გავიდა, სადაც მოქმედ ოლიმპიურ ჩემპიონ იაპონელ აარონ ვულფს დაუპირისპირდა და მას ვაზარით აჯობა. 1/2 ფინალში ქართველის მეტოქე შვეიცარიელი დანიელ აიხი იყო, რომელიც ილიამ 11 წამში იპონით დაამარცხა.

ბრინჯაოს მედლისთვის ბრძოლაში დამარცხდა ესპანეთის სახელით მოასპარეზე ნიკოლოზ შერაზადიშვილიც, რომელმაც შეხვედრა უზბეკ მუზაფარბეკ ტურობოიევთან დათმო.