ეპოქა დასრულდა - პოპოვიჩი სან ანტონიოს აღარ გაწვრთნის

ოფიციალური განცხადების მიხედვით, გრეგ პოპოვიჩი სან ანტონიო სპურსის მთავარი მწვრთნელი აღარ იქნება და გუნდის პრეზიდენტი გახდება.

პოპოვიჩს რეგულარული სეზონის ისტორიაში ყველაზე მეტი მოგება (1422) აქვს, სპურსს კი ტიტული 5-ჯერ მოაგებინა. ზედიზედ 18 სეზონი მის გუნდს 50 მოგება ჰქონდა და ზედიზედ 22-ჯერ პლეიოფში ითამაშა, რაც ასევე რეკორდია.

პოპოვიჩი 3-ჯერ NBA-ს წლის მწვრთნელად დასახელდა, პლეიოფში კი მისმა გუნდმა 170-ჯერ შეძლო გამარჯვება. გრეგი ასევე აშშ-ს ნაკრებთან ერთად ოლიმპიადის გამარჯვებული და კალათბურთის დიდების დარბაზის წევრია.

29 სეზონის შემდეგ სან ანტონიო სპურსს ახალი მწვრთნელი ეყოლება და ეს მიჩ ჯონსონი იქნება.