ევრო 2024 - ნაადრევი ფინალი, ან უბრალოდ დიდებული დაპირისპირება [პრევიუ და ჩვენი პროგნოზი]

ევრო 2024 ნელ-ნელა დასასრულს უახლოვდება, სულ სამი მატჩი გვაქვს დარჩენილი და დღეს პირველს ვიხილავთ - 1/2 ფინალურ დაპირისპირებაში ერთმანეთს ესპანეთი და საფრანგეთი დაუპირისპირდებიან.

ესპანეთი - საფრანგეთი [23:00]

ფურია როხას ამ ტურნირის მშვენებას და გადამრჩენელს უწოდებენ - ლუის დე ლა ფუენტეს გუნდი ერთადერთია, ვინც პრაგმატულ და მკვეთრად შედეგზე ორიენტირებულ ფებბურთს არ თამაშობს და მისი თამაშების ხილვაც მოსაწყენი არ არის. 

ჯგუფური ეტაპი ესპანეთმა 100%-იანი შედეგით და გოლგაუშვებლად გაიარა - 3-დან 3 მოგება, 5 გატანილი და 0 გაშვებული გოლი. 1/8 ფინალში ესპანეთმა საქართველოს ნაკრებს სძლია (4:1), შემდეგ კი ტურნირის მეორე ყველაზე სანახაობრივ, მასპინძელ გერმანიასთან დამატებითამდე მიიყვანა საქმე, სადაც ყველა უკვე პენალტების სერიას ელოდა, თუმცა მიკელ მერინომ 119-ე წუთზე ულამაზესი ნახტომით, თავით გაუტანა ნოიერს და ესპანეთს ზედიზედ მეორე ევროზე მოუტანა ნახევარფინალის საგზური.

დეშამის გუნდს ძალიან დიდი კრიტიკა ხვდება - საფრანგეთის ნაკრები გახდა ისტორიაში პირველი, რომელმაც ევროპის ჩემპიონატის ნახევარფინალში გასვლა, თამაშიდან გოლის გატანის გარეშე მოუწია. ჯგუფში ფრანგებმა მე-2 ადგილი დაიკავეს და მხოლოდ ავსტრიას მოუგეს (1:0) და ისიც ავტოგოლით, ნიდერლანდებთან უგოლო ფრე გააგორეს, პოლონეთთან კი 1:1 ითამაშეს და ორივე გოლი ამ მატჩში პენალტებიდან გავიდა. 

პლეი-ოფის პირველ სტადიაზე ფრანგებმა ბელგიას მატჩის მიწურულს გასული ავტოგოლით მოუგეს (1:0), პორტუგალიასთან კი უგოლო ფრე ითამაშეს და პენალტების სერიაში აჯობეს. 

დიდიე დეშამი ძალიან ფრთხილ ფეხბურთს თამაშობს და ცდილობს, დაცვაში შეცდომები მინიმუმამდე დაიყვანოს - გუნდი სამი გამოკვეთილი საყრდენით თამაშობს - ჩუამენის და კანტეს გვერდით ხან რაბიოს ვხედავთ, ხან კი კამავინგას.

ესპანეთისა და საფრანგეთის ურთიერთშეხვედრეის ისტორია 36 თამაშს ითვლის, საიდანაც 13 გამარჯვება ფრანგებს ერგოთ, 16 შემთხვევაში წარმატება ესპანეთმა იზეიმა, 7-ჯერ კი ფრე დაფიქსირდა.

ამ 36 თამაშში ესპანეთმა 64 გოლი გაიტანა, საფრანგეთმა კი - 39. 

უკანასკნელი დაპირისპირება 2021 წლის ერთა ლიგის ფინალში შედგა და საფრანგეთის გამარჯვებით 2:1 დასრულდა. ესპანეთმა ბოლო გამარჯვებას 2017 წლის ამხანაგურში მოიპოვა (2:0), ისტორიაში პირველი მატჩი კი 1922 წელს შედგა და ესპანეთის გამარჯვებით 4:0 დამთავრდა.

სავარაუდო შემადგენლობები

ესპანეთი: უნაი სიმონი, ხესუს ნავასი, ნაჩო, ლაპორტი, კუკურელია, ოლმო, როდრი, ფაბიან რუისი, ლამინ იამალი, ნიკო უილიამსი, მორატა

დისკვალიფიცირებულია: კარვახალი, ლე ნორმანი

საფრანგეთი: მენიო, კუნდე, სალიბა, უპამეკანო, ტეო ერნანდესი, კანტე, ჩუამენი, კამავინგა, გრიზმანი, კოლო მუანი, მბაპე.

ნახევარფინალურ ეტაპზე ყვითელი ბარათები ჩაიხსნა და ამიერიდან დისკვალიფიკაციის ზღვარზე არავინ აღარ არის. 

ჩვენი პროგნოზი: ძირითად დროში იქნება 2.5-ზე ნაკლები გოლი. თუმცა, ციფრებთან გაცნობა თუ გსურთ, თავად გადახედეთ ამ დაპირისპირების სტატისტიკას.