ევრო 2024-ის პირველ 1/2 ფინალურ შეხვედრაში ერთმანეთს ესპანეთისა და საფრანგეთის ნაკრებები დაუპირისპირდნენ.
მატჩში ანგარიში სწრაფი გოლით გაიხსნა. მე-9 წუთზე კილიან მბაპეს საჯარიმოში ჩაწოდების შემდეგ რანდალ კოლო მუანიმ უნაი სიმონის კარი თავური დარტყმით აიღო.
ესპანელებმა თამაშის მოტრიალება პირველივე ტაიმში შეძლეს. 21-ე წუთზე ლამინ იამალმა საჯარიმოს გარედან ულამაზესი დარტყმით გაათანაბრა ანგარიში. ამ გოლიდან 4 წუთში კი ფურია როხა უკვე წინ გავიდა. დანი ოლმომ საჯარიმოში ტექნიკურად ჩამოიშორა ორელიენ ჩუამენი და ფრანგების კარის ბადე კიდევ ერთხელ შეარხია. ოლმოსთვის ეს მიმდინარე ტურნირზე მე-3 გოლი აღმოჩნდა.
მეორე ტაიმში ანგარიშის მხრივ არაფერი შეცვლილა. დიდიე დეშამის ცვლილებების მიუხედავად თამაშში გარდატეხა ფრანგებმა ვერ მოახერხეს. ესპანეთმა კი მინიმალური სხვაობის მიუხედავად დამაჯერებლად იმარჯვა და ფინალის საგზური მოიპოვა.
დე ლა ფუენტეს გუნდის მეტოქე ფინალურ შეხვედრაში ნიდერლანდებისა და ინგლისის ნაკრებებს შორის გამარჯვებული იქნება.
მეორე 1/2 ფინალური მატჩი 10 ივლისს (23:00) გაიმართება. ევრო 2024-ის ფინალი კი 14 ივლისს ბერლინში ჩატარდება.
