სიახლეები
სეტანტა
სპორტის გურუ
ქვიზები
Copyright © 2023 Adjarabet Arena. All Rights Reserved.
-
Aa
+
ფონტის ზომა
დღეს ფორმულა 1-ის სამყაროში კალენდრის ერთ-ერთ ყველაზე ისტორიულ და მნიშვნელოვან ტრასაზე მორიგი რბოლა გაიმართა.
საუბარია დიდ ბრიტანეთსა და სილვერსტოუნზე, სადაც კვალიფიკაციის შემდეგ რბოლის სათავეში სამი ბრიტანელი მრბოლელი იდგა. რბოლას პირველი პოზიციიდან მერსედესის წარმომადგენლები - ჯორჯ რასელი და ლუის ჰემილტონი იწყებდნენ, მე-3 პოზიციას კი მაკლარენის ლიდერი ლანდო ნორისი ამაგრებდა.
რბოლის განმავლობაში სცენარი ბევრჯერ შეიცვალა, მრბოლელები ერთმანეთს ლიდერობას ართმევდნენ, ამინდიც ცვალებადი იყო, წვიმა და მზე ერთმანეთს ენაცვლებოდა, რის გამოც გუნდებს სტრატეგიის შეცვლა რამდენიმეჯერ მოუწიათ.
პოულ პოზიციის მფლობელი ჯორჯ რასელი რბოლას ბოლიდის პრობლემების გამო ნაადრევად გამოეთიშა.
ბოლო წრეებზე კი გამოიკვეთა სცენარი, რომლის მიხედვითაც პოდიუმის ადგილებს ლუის ჰემილტონი, ლანდო ნორისი და მაქს ვერსტაპენი (რედ ბული) დაიკავებდნენ და მოგება სამივე მათგანს შეეძლო, საბოლოოდ კი გამარჯვება ლეგენდარულ სერ ლუისს დარჩა, მე-2 ადგილზე მოქმედი ჩემპიონი ვერსტაპენი გავიდა, მე-3 პოზიციას კი ნორისი დასჯერდა.
ჰემილტონისთვის აღნიშნული გამარჯვება საკუთარ კედლებში, კერძოდ სილვერსტოუნზე რეკორდული აღმოჩნდა. ლუისმა ამ ტრასაზე კარიერაში მეცხრედ მოიგო, ფორმულა 1-ის ისტორიაში კი ერთ კონკრეტულ ტრასაზე ამდენჯერ არცერთ პილოტს მოუპოვებია გამარჯვება. ბრიტანელმა მიხაელ შუმახერის რეკორდი მოხსნა.
ჰემილტონმა 2021 წლის შემდეგ რბოლა პირველად მოიგო, ეს მის კარიერაში 104-ე გამარჯვება და 199-ე პოდიუმი აღმოჩნდა, რაც, რა თქმა უნდა, ასევე რეკორდია.
სილვერსტოუნზე ათეულში შევიდნენ და ქულები მოიპოვეს შემდეგმა მრბოლელებმა: ოსკარ პიასტრი (მაკლარენი), კარლოს საინსი (ფერარი), ნიკო ჰულკენბერგი (ჰაასი), ლენს სტროლი (ასტონ მარტინი), ფერნანდო ალონსო (ასტონ მარტინი), ალექს ალბონი (ვილიამსი), იუკი ცუნოდა (RB).
სწრაფი წრე კარლოს საინსმა დააფიქსირა და დამატებითი ქულა დაიმსახურა.
სეზონის ამ ეტაპზე ჩემპიონობისთვის ბრძოლას 255 ქულით მაქს ვერსტაპენი ლიდერობს, მე-2 ადგილზე ლანდო ნორისია 171 ქულით, მე-3 და მე-4 ადგილზე კი ფერარის წარმომადგენლები - შარლ ლეკლერი და კარლოს საინსი არიან 150 და 146 ქულით.
რაც შეეხება კონსტრუქტორთა დავას, აქ ერთპიროვნული ლიდერი რედ ბულია 373 ქულით, მე-2-ზე ფერარი იმყოფება 302 ქულით, მე-3 კი მაკლარენია 295 ქულით.
ფორმულა 1-ის შემდეგი გრანპრი 19-21 ივლისს უნგრეთში გაიმართება.
თ
თაზო ჩარკვიანი
კომენტარები