NBA-ს ლეგენდარული კალათბურთელი მეჯიქ ჯონსონი მეორე ლეგენდას დიკემბე მუტომბოს დაემშვიდობა.
"გულგატეხილი ვარ ჩემი ძვირფასი მეგობრისა და კალათბურთის დიდების დარბაზის წევრის, დიკემბე მუტომბოს გარდაცვალების გამო. ის იყო არა მხოლოდ დიდებული კალათბურთელი, რომელსაც ფარის დაცვა ელიტური ბლოკებით შეეძლო, არამედ ასევე საოცარი ადამიანი ოქროს გულით.
მან საკუთარი ცხოვრების დიდი ნაწილი სხვებს მიუძღვნა, რაზეც მისი გაკეთებული საქმე მიუთითებს აშშ-სა და აფრიკაში. მისი ფონდის დახმარებით მან 29 მილიონი დოლარი მოახმარა თავის სამშობლო კონგოში ჰოსპიტალის გახსნას, პირადად კი პროექტში 15 მილიონი დოლარი ჩადო. როგორც NBA-სა და გაეროს კეთილი ნების ელჩმა წლების განმავლობაში თავისი ჰუმანიტარული საქმიანობისთვის უამრავი დამსახურებული ჯილდო მიიღო.
ნამდვილად მომენატრება მისი ღიმილი, მისი სულისკვეთება და მისი ძლიერი ხმა. ასეთ რთულ დროს ჩვენი ფიქრები მის მეუღლე როუზთან, მის შვილებთან და ოჯახის სხვა წევრებთანაა." - წერს ამერიკელი ლეგენდა სოციალურ ქსელში.
დიკემბე მუტომბო 58 წლის ასაკში თავის ტვინის სიმსივნის გამო გარდაიცვალა.
კონგოელ-ამერიკელი კალათბურთელი კარიერის განმავლობაში დენვერ ნაგეთსში, ატლანტა ჰოუქსში, ფილადელფია სევენთისიქსერში, ნიუ ჯერსი ნეტსში, ნიუ იორკ ნიქსსა და ჰიუსტონ როკეტსში თამაშობდა.
მას ოლ-სტარში 8-ჯერ აქვს მონაწილეობა მიღებული. მუტომბო ყველა დროის ერთ-ერთ საუკეთესო მცველად ითვლება, რაზეც ის ფაქტიც მიუთითებს, რომ ის წლის საუკეთესო დაცვითი მოთამაშე 4-ჯერ გახდა.
მისი 55-ნომრიანი მაისური ატლანტა ჰოუქსსა და დენვერ ნაგეთსში არის გაუქმებული. მუტომბოს პირადი სტატისტიკა NBA-ში ასეთია - 11729 ქულა, 12359 მოხსნა, 3289 დაფარება.
