ინგლისელთა რევანში საბერძნეთში - ჯგუფის გამარჯვებული ბოლო ტურში გაირკვევა

უეფას ერთა ლიგის მე-5 ტურში, B დივიზიონის მატჩში საბერძნეთის ნაკრებმა ათენში ინგლისს უმასპინძლა.

შეხვედრაში ანგარიში მე-7 წუთზე გაიხსნა. სტუმრები ოლი უოტკინსმა დააწინაურა. ინგლისელებმა პირველი ტაიმი 0-1 მოიგეს.

78-ე წუთამდე ანგარიში ნარჩუნდებოდა, თუმცა ბერძნებმა კიდევ ერთი გოლი გაუშვეს. ავტოგოლი ოდისეას ვლახოდიმოსს ჩაეთვალა. 83-ე წუთზე კი მატჩს საბოლოო წერტილი დებიუტანტმა კურტის ჯონსმა დაუსვა (0-3). ინგლისის ნაკრებმა უემბლიზე საბერძნეთთან მარცხისთვის სრულფასოვანი რევანში აიღო.

ჯგუფის მეორე მატჩში ირლანდიამ ფინეთი 1-0 დაამარცხა.

ამ ჯგუფში ბოლო ტურის წინ უკვე გარკვეულია თუ ვინ გავარდება პირდაპირ C ლიგაში და ეს ფინეთის ნაკრები იქნება, რომელსაც 0 ქულა აქვს.

ინგლისსა და საბერძნეთს შორის კი A ლიგაში პირდაპირ დაწინაურებული გუნდის ვინაობას ბოლო მატჩებში გავიგებთ. სამი ლომი უემბლიზე ირლანდიას მიიღებს, ბერძნები კი ფინეთს ეწვევიან.