ოლიმპიადა ოფიციალურად დასრულდა და შეგვიძლია, საქართველოსთვის მისი შედეგები თავისუფლად შევაჯამოთ.
როგორც იცით, ჩვენმა სპორტსმენებმა საქართველოს 3 ოქრო, 3 ვერცხლი და 1 ბრინჯაო მოუტანეს. ჯამში შვიდი მედლით საქართველომ საერთო ჩათვლაში 24-ე ადგილი დაიკავა, რაც დამოუკიდებლობის ისტორიაში ჩვენი ქვეყნისთვის საუკეთესო შედეგია.
აქამდე, საუკეთესო შედეგი 2008 წლის პეკინის ოლიმპიადაზე გვქონდა დაფიქსირებული, როცა იმავე 7 მედლით (3 ოქრო, 2 ვერცხლი და 2 ბრინჯაო) საერთო ჩათვლაში 28-ე პოზიციას დავჯერდით.
მედლების საერთო რაოდენობით საუკეთესო ოლიმპიადა არ გამოგვივიდა - ასეთად ტოკიო 2020 რჩება, საიდანაც ქართველები 8 მედლით (2 ოქრო, 5 ვერცხლი, 1 ბრინჯაო) დაბრუნდნენ.
სამაგიეროდ, პარიზი 2024 იყო ჩვენი ქვეყნის ისტორიაში მხოლოდ მეორე შემთხვევა, როცა 2-ზე მეტი ოქროს მედლის მოპოვება შევძელოთ - პირველი შემთხვევა 2008 წლის პეკინის ოლიმპიადაზე დაფიქსირდა, საიდანაც ოქროთი დაბრუნება ირაკლი ცირეკიძემ (ძიუდო), მანუჩარ კვირკველიამ (ბ/რ ჭიდაობა) და რევაზ მინდორაშვილმა (თავისუფალი) შეძლეს.
ხაზგასასმელია ის ფაქტიც, რომ პარიზის ოლიმპიურ თამაშებზე საქართველოს დამოუკიდებლობის ისტორიაში ყველაზე ცოტა ქართველი სპორტსმენი წარსდგა (28). აქამდე 30-ზე ნაკლები არასდროს არ გვყოლია გაშვებული, რიო 2016-ზე კი საერთოდაც 40 სპორტსმენი გავუშვით.
პარიზი 2024-ს შემდეგ, საქართველოსთვის ყველაზე წარმატებულ ოლიმპიურ სპორტის სახეობად ძიუდო რჩება - 5 ოქრო, თუმცა, ეს თუ მხოლოდ პირველ ადგილს გათითვალისწინებთ. სხვა მხრივ კი, მედლების საერთო რაოდენობით ჭიდაობა ლიდერობს (21), ძიუდო მეორე ადგილზეა (15), ძალოსნობა კი - მესამეზე (8).
წლევანდელი ოლიმპიური თამაშების შემდეგ, საქართველოს დამოუკიდებლობის ისტორიაში ყველაზე წარმატებულ სპორტსმენად ლაშა ტალახაძე იქცა, რომელმაც მესამედ შეძლო ოლიმპიური ოქროს მოგება. მთლიანობაში, საქართველოს ძალოსნობაში ოლიმპიადებზე 4 ოქრო აქვს მოგებული, საიდანაც 3 სწორედ ლაშას ეკუთვნის (ერთი 2004-ში მისმა მწვრთნელმა, გიორგი ასანიძემ მოიგო).
პარიზის ოლიმპიურ თამაშებზე 24 წლის შემდეგ პირველად, კრივში შევძელით მედლის მოპოვება - უკანასკნელად ეს 2000 წლის სიდნეის თამაშებზე მძიმეწონოსან ვლადიმერ ჭანტურიას ჰქონდა გაკეთებული (ბრინჯაო), წელს კი იგივე გაიმეორა ლაშა გურულმაც.
უსიამოვნო ფაქტის გარეშეც არ დავრჩენილვართ - პარიზი 2024 გახდა პირველი ოლიმპიადა 1996-ს ატლანტას თამაშების შემდეგ, რომელზეც საქართველოს ბერძნულ-რომაულმა ჭიდაობამ ვერცერთი მედალი ვერ მოუტანა.
მოპოვებული 3 ვერცხლი - დამოუკიდებელი საქართველოს ისტორიაში მე-2 საუკეთესო შედეგია. აქამდე, 2-ზე მეტი ვერცხლი ოლიმპიადიდან მხოლოდ 2020 წელს გვქონდა წამოღებული (5).
ბოლო ორი წელია, საქართველო ოლიმპიადიდან სტაბილურად ერთი ბრინჯაოთი ბრუნდება - 2020-ში მესამე ადგილი ძალოსანმა ანტონ პლესნოიმ დაიკავა, 2024-ში კი მოკრივე ლაშა გურულმა.
ერთადერთი შემთხვევა, როცა საქართველო ოლიმპიადიდან ბრინჯაოს გარეშე დაბრუნდა - 2004 წლის ათენის თამაშები იყო (2 ოქრო, 2 ვერცხლი).
ზედიზედ მეექვსე ოლიმპიადაა, საქართველო თამაშებს ოქროს მედლის გარეშე არ ასრულებს - ამ პერიოდში ყველაზე ცოტა (1) ოქრო ლონდონის 2012 წლის ოლიმპიურ თამაშებზე მოვიპოვეთ, როცა პირველი ადგილის დაკავება ძიუდოისტმა ლაშა შავდათუაშვილმა შეძლო.
გენო პეტრიაშვილი გახდა დამოუკიდებელი საქართველოს ისტორიაში მე-2 სპორტსმენი, რომელმაც სამი სხვადასხვა ოლიმპიადიდან, სამი სხვადასხვა სინჯის მედლის წამოღება შეძლო, აქამდე ეს ლაშა შავდათუაშვილს ჰქონდა გაკეთებული (2012 ოქრო, 2016 ბრინჯაო და 2020 ვერცხლი) - გენომ მედლები უფრო თანმიმდევრულად დაალაგა (2016 ბრინჯაო, 2020 ვერცხლი, 2024 ოქრო).
შემდეგი ოლიმპიადა 2028 წელს, ლოს ანჯელესში გაიმართება.
