კვარაცხელია სასტარტოში ბრუნდება - ნაპოლი მილანს ესტუმრება

იტალიის სერია ა-ს მე-10 ტურში ნაპოლი სან სიროზე მილანს ესტუმრება (29 ოქტომბერი, 23:45).

ანტონიო კონტეს გუნდი სატურნირო ცხრილში 22 ქულით პირველ ადგილზეა და მდევარ ინტერს 4 ქულით უსწრებს, მილანი კი 14 ქულით მე-8 ადგილზეა.

ნაპოლის პირველ ტურში ვერონასთან წაგების შემდეგ სერია ა-ში 8-მატჩიანი წაუგებელი სერია აქვს, საიდანაც 7 მოიგო და 1 ფრედ ითამაშა.

99%-ით ლეჩესთან სათადარიგო სკამზე დატოვების შემდეგ ანტონიო კონტე სასტარტო შემადგენლობაში დააბრუნებს ხვიჩა კვარაცხელიას, რომელიც მილანთან სტატისტიკის გამოსწორებას ეცდება.

ქართველ ფეხბურთელს როსონერისთან სერია ა-სა და ჩემპიონთა ლიგის ჩათვლით 6 მატჩი აქვს ჩატარებული და ჯერ-ჯერობით საგოლე მოქმედების გარეშეა. ის მილანის წინააღმდეგ მხოლოდ 1 გამომუშავებული პენალტით იწონებს თავს.

ნაპოლიმ კი ამ 6 შეხვედრაში მხოლოდ 1 გამარჯვება მოიპოვა, 2 ფრედ ითამაშა და 3 მატჩი დათმო.

ამ სეზონში მილანის გამორჩეული მოთამაშე კრისტიან პულიშიჩია, რომლის ანგარიშზეც სერია ა-ში 5 გოლი და 3 საგოლე გადაცემაა, ნაპოლიში კი შემტევი დუეტია კარგ ფორამში, ხვიჩა კვარაცხელიას აქტივში 4 გოლი და 2 ასისტია, რომელუ ლუკაკუს კი 3 გოლი და 4 საგოლე გადაცემა აქვს.