მანჩესტერულ დერბიში სიტიმ იმარჯვა - ჰალანდმა დუბლი შეასრულა

ინგლისის პრემიერ ლიგის მე-4 ტურის ცენტრალურ მატჩში მანჩესტერული დერბი შედგა.

შეხვედრაში ანგარიში მე-18 წუთზე ფილ ფოდენმა თავური დარტყმით გახსნა, რომელსაც საგოლე გადაცემა ჯერემი დოკუმ გაუკეთა. ფოდენმა პრემიერ ლიგის ბოლო 7 მანჩესტერულ დერბიში მე-7 გოლი გაიტანა.

VIDEO: ფილ ფოდენის თავური გოლი მანჩესტერ იუნაიტედის კარში

53-ე წუთზე სხვაობა ორამდე ერლინგ ჰალანდმა გაზარდა, რომელმაც ბაინდირს თავზე გადაუგდო ბურთი და მორიგი გოლი გაუტანა იუნაიტედს, ასისტი კი კვლავ დოკუმ მიითვალა.

68-ე წუთზე სიტის ნორვეგიელმა თავდამსხმელმა დუბლი შეასრულა, ამჯერად კი საგოლე გადაცემა ბერნარდუ სილვას ანგარიშზე იყო.

ჰალანდი პრემიერ ლიგაში მანჩესტერულ დერბიში გატანილი გოლებით უიენ რუნისა და სერხიო აგუეროს (8 გოლი) გაუთანაბრდა. მას ამისთვის მხოლოდ 6 მატჩი დასჭირდა.

საბოლოოდ სიტიმ იუნაიტედი 3-0 დაამარცხა და 4 ტურის შემდეგ 6 ქულა დააგროვა. იუნაიტედს კი 4 ქულა რჩება.