მიქაუტაძე სიაში პირველია - რომას აქტიურობა და გამოწვევა მონაკოს

იტალიური Corriere dello Sport გიორგი მიქაუტაძის გარშემო არსებულ ვითარებაზე ინფორმაციას ავრცელებს.

რომში მუშაობენ, რომ დანიელე დე როსის სასტარტო შემადგენლობისთვის თავდამსხმელი მიუყვანონ, სიაში პირველი კი მიქაუტაძეა.

ლუკაკუ, რომელმაც ყვითელი და წითელი ფერები სწრაფად დაივიწყა, სავარაუდოდ გულშემატკივრებს, რომლებმაც ის თავიდანვე მეფედ აღიარეს, მალე დაემშვიდობება. ტამი აბრაჰამიც მიუხედავად ბევრი მუშაობისა, დიდი ალბათობით პრემიერ ლიგაში დაბრუნდება.

რომას კი ახალი თავდამსხმელი სჭირდება, რომელიც დე როსის სტილს მოერგება. კლუბი კი მზადაა, რომ ამ პოზიციაზე დიდი ინვესტიცია ჩადოს.

რომა ემზადება, ოფიციალური შეთავაზება გააკეთოს და მონაკოს შეეჯიბროს. სწორედ ეს ორი კლუბი იბრძვის ქართველი თავდამსხმელის დამატებისთვის. როგორც მეცის პრეზიდენტმაც დაადასტურა, მოთამაშით რამდენიმე კლუბია დაინტერესებული. მონაკოს სპორტულმა დირექტორმაც განაცხადა, რომ ისინი კონკურენციაში არიან სხვა კლუბებთან და პროცესი ნებისმიერ დროს შეიძლება დაჩქარდეს. 

სატრანსფერო ფასად 20-დან 25 მილიონ ევრომდე სახელდება, რომას ხელმძღვანელობა კი მზადაა და არ ეშინია, რომ აუქციონზე სხვა კლუბებს კონკურენცია გაუწიოს. 

კიდევ ერთი სახელი, რომელიც დედაქალაქური კლუბის გარშემო სახელდება სორლოტია, თუმცა აქ ვითარება უფრო რთულადაა, რადგან მის გამოსასყიდ თანხად 38 მილიონი ევრო სახელდება, ეს კი რომას ებევრება.

რომა თუ მონაკო? გიორგი მიქაუტაძისთვის ბრძოლა გრძელდება. სავარაუდოდ, ქართველის მომავალი მალე უნდა გადაწყდეს.