მიქაუტაძისთვის რბოლა მონაკოს გამარჯვებით დასრულდა

ფრანგული L'Equipe-ის ცნობით, მეცის ქართველი თავდამსხმელი გიორგი მიქაუტაძე მონაკოს ფეხბურთელი ხდება.

საფრანგეთში ეს ერთ-ერთი დიდი სატრანსფერო საგა იყო, რომელიც უახლოეს საათებში დასრულდება. როგორც რამდენიმე კვირის წინ გახდა ცნობილი, გიორგი მიქაუტაძეს მონაკოში გადასვლა სურდა.

მოთამაშეს ჩემპიონთა ლიგაზე თამაშის პერსპექტივა ხიბლავდა, თან იმ პირობით, რომ ლიგა 1-ში ითამაშებდა, იმ ჩემპიონატში, რომელსაც კარგად იცნობს. მეცის თავდამსხმელს მონაკოს სპორტულ დირექტორთან და მთავარ მწვრთნელთან ჰქონდა საუბრები.

ევროპის ჩემპიონატის წინ კლუბებს შორის ზეპირი შეთანხმება შედგა, მაგრამ ეს ოფიციალურ შეთავაზებაში არ აისახა. გასულ უიქენდზე კი პარიზში წარმომადგენლებს შორის მოლაპარაკება ისევ გაიმართა. მეცმა მიქაუტაძე აიაქსიდან 13 მილიონ ევროდ გამოისყიდა, ახლა კი მონაკოში 25 მილიონ ევროდ ყიდის.

ცნობილი იტალიელი ჟურნალისტის ფაბრიციო რომანოს ინფორმაციითაც, მონაკო ტრანსფერს ხურავს.

გასარკვევი მხოლოდ მცირე დეტალები დარჩა და შეთანხმება საბოლოოდ შედგება.

პირადი დეტალებიც უკვე გარკვეულია და ტრანსფერი მალე ოფიციალურად დაიხურება.

ასე და ამგვარად, გიორგი მიქაუტაძე მონაკოს ფეხბურთელი ხდება.