ოფიციალურად: ლუკა ლოჩოშვილი ნიურნბერგის მოთამაშეა

ნიურნბერგის ოფიციალური გვერდის განცხადებით, ლუკა ლოჩოშვილი იტალიური კრემონეზედან გერმანულ კლუბს შეუერთდა და მიროსლავ კლოზეს შემადგენლობას გააძლიერებს.

ლოჩოშვილი კრემონეზეში 2022 წლიდან ასპარეზობდა, სადაც ავსტრიული ვოლფსბერგერიდან გადავიდა. მან გასული სეზონის მეორე ნახევარი იჯარის წესით ასევე იტალიურ სალერნიტანაში გაატარა.

27 წლის ქართველი მცველი ნიურნბერგში 24-ნომრიან მაისურს მოირგებს.

"მიხარია, რომ ასეთი ტრადიციული კლუბის ნაწილი ვარ. ველოდები ახალ სეზონს გუნდთან ერთად. მოტივირებული ვარ და მინდა ახალგაზრდა გუნდთან ერთად პასუხისმგებლობა ავიღო." - განაცხადა ლოჩოშვილმა კონტრაქტის გაფორმების შემდეგ.

"გვიხარია, რომ ლუკამ ჩვენი გზა აირჩია. მისი გამოცდილებით, საფეხბურთო ხარისხითა და ფიზიკური მონაცემებით, ის ჩვენი გუნდისთვის ნამდვილი აქტივია. ის თავისი მენტალიტეტით მოედანზე და მის მიღმა დაგვეხმარება." - თქვა ნიურნბერგის სპორტულმა დირექტორმა.

ნიურნბერგმა მე-2 ბუნდესლიგის გასულ სეზონში მე-10 ადგილი დაიკავა. გუნდის მთავარი მწვრთნელი გერმანიის ნაკრების ყოფილი თავდამსხმელი მიროსლავ კლოზეა.