ფიფას რეიტინგი განახლდა - საქართველომ წინ წაიწია

დიდი სანაკრებო ტურნირების - ევრო 2024-სა და კოპა ამერიკა 2024-ის დასრულების შემდეგ ფიფას რეიტინგი განახლდა.

რეიტინგის ლიდერი უცვლელია, თუმცა ცვლილებებია ათეულში.

1. არგენტინა

2. საფრანგეთი

3. ესპანეთი (+5)

4. ინგლისი (+1)

5. ბრაზილია (-1)

6. ბელგია (-3)

7. ნიდერლანდები

8. პორტუგალია (-2)

9. კოლუმბია (+3)

10. იტალია

სიას კვლავ სათავეში უდგას მსოფლიოსა და სამხრეთ ამერიკის ჩემპიონი არგენტინა, ევროპის ჩემპიონატის გამარჯვებულმა ესპანეთმა კი დიდი ნახტომი გააკეთა და მე-8-დან მე-3 ადგილზე გადაინაცვლა.

ათეულში ადგილი დაკარგა ევრო 2024-ზე ჯგუფში ჩარჩენილმა ხორვატიამ, რომელიც მე-9-დან მე-12 პოზიციაზე აღმოჩნდა, მას ადგილი კი კოპა ამერიკა 2024-ის ფინალისტმა კოლუმბიამ გაუცვალა.

ისტორიული ევროპის ჩემპიონატის შემდეგ რეიტინგში წინ წაიწია საქართველოს ნაკრებმაც, რომელიც ევრო 2024-ის დაწყებამდე 74-ე ადგილზე იყო, ახლა კი ეროვნული გუნდი 4 პოზიციით წინ აღმოჩნდა და 70-ე ადგილს იკავებს.

ამ წინსვლით საქართველომ ისლანდიის, ჩრდილოეთ მაკედონიის, მონტენეგროსა და ჩრდილოეთ ირლანდიის ნაკრებები (71-74) ჩამოიტოვა.

ჩვენზე წინ რეიტინგში (67-69) ბურკინა ფასოს, იორდანიისა და არაბთა გაერთიანებული საამიროების ნაკრებები არიან.

ფიფას რეიტინგში ყველაზე დიდი წინსვლა კოპა ამერიკა 2024-ის 1/4 ფინალისტ ვენესუელას ჰქონდა, რომელმაც 17 პოზიციით წაიწია წინ და ახლა 37-ე ადგილზეა, ჩეხეთის ნაკრებმა კი ევრო 2024-ზე ჯგუფში ჩარჩენის შემდეგ 13 პოზიციით დაიხია უკან და ახლა 47-ე ადგილზეა.