6 ოქტომბერს UFC 307-ზე რომან დოლიძე საშუალო წონის ბრძოლაში კევინ ჰოლანდს დაუპირისპირდება.
მანამდე გავიხსენოთ ქართველი მებრძოლის გავლილი გზა UFC-ში. 36 წლის დოლიძის კარიერული რეკორდი 13-3-0 არის, UFC-ში კი მას 10 ბრძოლა აქვს ჩატარებული, საიდანაც 7 მოგება და 3 მარცხია.
რომან დოლიძემ ასპარეზობა ქვემძიმე წონაში დაიწყო, სადაც მისი დებიუტი 2020 წლის ივლისში ხადის იბრაგიმოვის წინააღმდეგ შედგა. ქართველმა რუსი მეტოქე პირველ რაუნდში ნოკაუტით დაამარცხა.
დოლიძის მომდევნო ბრძოლა იმავე წლის დეკემბერში ასევე ქვემძიმე წონაში შედგა, სადაც მან ჯონ ალენს 3-რაუნდიან დაპირისპირებაში გადაწყვეტილებით სძლია.
2021 წელს რომან დოლიძე უკვე საშუალო წონაში გადავიდა, სადაც მისი პირველი მეტოქე ტრევინ ჯაილსი იყო. ქართველი 3-რაუნდიან ბრძოლაში გადაწყვეტილებით დამარცხდა.
მარცხიდან 3 თვეზე ნაკლებში დოლიძემ მორიგი ბრძოლა ლაურეანო სტაროპოლისთან გამართა და გადაწყვეტილებით გაიმარჯვა.
რომანის UFC კარიერაში ყველაზე წარმატებული წელი 2022 იყო. ივნისიდან დეკემბრამდე მან 3 ბრძოლა გამართა და სამივეში გაიმარჯვა, თანაც სამივეში ვადაზე ადრე.
დოლიძის პირველი მსხვერპლი კაილ დაუკაუსი იყო, რომელსაც ბრძოლა პირველივე რაუნდში დაუსრულა. უკვე ოქტომბერში ასევე პირველ რაუნდში მოუგო დაპირისპირება ფილ ჰოუსს, წელი კი რომანმა ჯეკ ჰერმანსონთან მე-2 რაუნდში ტექნიკური ნოკაუტით დააგვირგვინა.
2023 წელს ქართველმა ერთადერთი ბრძოლა გამართა. მარტში ის მარვინ ვეტორის დაუპირისპირდა და 3-რაუნდიან ბრძოლაში გადაწყვეტილებით დამარცხდა.
კევინ ჰოლანდთან დაპირისპირება დოლიძისთვის 2024 წელს მე-3 იქნება. თებერვალში ქართველი UFC კარიერაში პირველად საბრძოლო ღამის მთავარი ბრძოლის მონაწილე იყო, სადაც ნასურდინ იმავოვთან 5-რაუნდიან დაპირისპირებაში გადაწყვეტილებით წააგო.
ივნისში დოლიძე ქვემძიმე წონას დაუბრუნდა და 3 რაუნდში გადაწყვეტილებით ენტონი სმიტს მოუგო, 6 ოქტომბერს კი რომანი ისევ საშუალო წონაში კევინ ჰოლანდს შეერკინება.
ამ მომენტისთვის რომან დოლიძე UFC-ის საშუალო წონის რეიტინგში მე-10 პოზიციაზეა.
თამაშგარეთ - რომან დოლიძე
