სასჯელი არგენტინელებს ბანერის გამო

მუნდიალის ნახევარფინალში ინგლისზე გამარჯვების (2:1) შემდეგ, არგენტინის ნაკრების ფეხბურთელები შესაძლოა ფიფას მხრიდან სერიოზული სანქციების წინაშე დადგნენ.

მიზეზი მატჩის შემდგომი ზეიმია, რომლის დროსაც ჯოვანი ლო ჩელსომ და გუნდის სხვა მოთამაშეებმა მოედანზე გამოფინეს ბანერი წარწერით: „Las Malvinas son Argentinas“ („ფოლკლენდის კუნძულები არგენტინას ეკუთვნის“).

ფოლკლენდის არქიპელაგი დიდი ბრიტანეთის შემადგენლობაშია, თუმცა არგენტინა მასზე პრეტენზიას დღემდე აცხადებს. ამ ტერიტორიისთვის ორ ქვეყანას შორის 1982 წელს 74-დღიანი ომიც კი გაჩაღდა, რომელსაც ასეულობით სამხედროს სიცოცხლე შეეწირა. ფიფას წესდება კი მატჩების დროს ნებისმიერ პოლიტიკურ მესიჯსა და აქტივობას მკაცრად კრძალავს.

არგენტინის ფეხბურთის ასოციაციას (AFA) ზუსტად ამავე შინაარსის ბანერის გამო 2014 წელს უკვე დაეკისრა ფულადი ჯარიმა 20 000 ფუნტი სტერლინგის ოდენობით. წესების განმეორებითი დარღვევის გამო, ამჯერად სანქციები შესაძლოა ბევრად უფრო მკაცრი იყოს - ფინანსურ ჯარიმასთან ერთად, საქმეში მონაწილე კონკრეტულ ფეხბურთელებს შესაძლოა დისკვალიფიკაციაც კი დაემუქროთ.

მომხდარს ბრიტანეთის მთავრობის წევრი პიტერ კაილიც გამოეხმაურა:

ეს სრულიად შეუსაბამო საქციელია. პოლიტიკა ფეხბურთისგან შორს უნდა იდგეს. ეს მსოფლიო ჩემპიონატის მთავარი პრინციპია, ხოლო გადაწყვეტილება სანქციების შესახებ ახლა მთლიანად ფიფაზეა დამოკიდებული