უარი რუსებსა და 12-მილიონიან კატარულ შემოთავაზებას - კიტეიშვილის შტურმში დარჩენის ისტორია

Geo Team-ის ინფორმაციით, ავსტრიულ შტურმთან ერთად ჩემპიონთა ლიგაზე სათამაშოდ, ოთარ კიტეიშვილმა სარფიან შემოთავაზებებზე თქვა უარი.

ქართველ ნახევარმცველს კატარული ალ არაბი წლიური ხელფასის სახით 4 მილიონ ევროს სთავაზობდა. თუმცა, კიტეიშვილმა აზიაში თამაში არ მოისურვა და ამ მრავალმილიონიან შემოთავაზებაზე უარი თქვა.

მეორე შემოთავაზება მოსკოვის დინამოდან იყო, რომელიც კიტეს თვეში 200 ათას ევროს სთავაზობდა. თუმცა, ქართველმა რუსეთში თამაშის იდეაც დაბლოკა.

ინტერესი იყო ასევე გერმანული აუგსბურგისგან და უნიონ ბერლინისგანაც, თუმცა ორივე ეს კლუბი კიტეიშვილს იმაზე დაბალ ხელფასს სთავაზობდა, ვიდრე ის შტურმში იღებს.

საბოლოოდ, შეთანხმება ვერ მოხერხდა და კიტეიშვილი შტურმში დარჩა, რომელთან ერთადაც გასულ სეზონში ავსტრიის ჩემპიონატი მოიგო, ტურნირის საუკეთესო ფეხბურთელი გახდა და ჩემპიონთა ლიგის საგზურიც მოიპოვა.